..flutningur yfir haf...

Elsku Astrid...

2012-01-22T23:50:00.005+01:00

.. um leið og ég þakka þér kærlega fyrir yndislegar stundir í æsku minni, þegar ég týndist í undraheimi Ronju, Línu, Míó og bróðurs míns ljónshjarta, veit ég ekki alveg hvernig ég á að orða það sem kemur hér á eftir.

Þannig vill til að ég á 6 ára stelpu sem er með rautt hár, freknur og óslökkvandi þorsta fyrir sögum. Hún telur nú, eftir sirka 2-3 ÁRA Línu tímabil að hún sé Lína. Raunverulega.

Á föstudaginn kom ég inn í herbergið hennar og sá hana hvergi. Það var af því að augnlína mín var ekki að kíkja á það sem var ofar en þeir rösku 120 sentimetrar sem hún telur nú í hæð. Hún var auðvitað búin að koma sér fyrir uppá rúmgrindinni því að það er mjög eðlilegt fyrir Línur þessa heims.

Hún svaf "öfugt" í rúminu sínu um daginn. Ég veit ekki hvernig henni datt það í hug.

Mér telst svo til að hún hafi hlustað á leikritið um Línu 20-30 sinnum síðastliðna viku.

Hún bað um apa á laugardaginn. Lifandi. Til vara vill hún hest.

Hún mætir reglulega í skólann klædd í Línukjólinn sinn og í sitthvorum sokknum.

Ég orga líklega ef ég heyri aftur söng sjóræningjana þegar þeir mæta í bæinn.

Elsku Astrid. Ég get ekki meiri Línu. Ég vona að þú skiljir það.

Við lásum líka spenntar um elsku Míó minn sem ferðaðist um Landið í fjarskanum og fundum fyrir ískaldri klónni sem tilheyrði riddaranum Kató. Það hreinlega lamaði okkur úr hræðslu.

Hún svaf ekki í viku.

Af og til skreppur hún þó í heimsókn til Maddit og Betu þar sem hún lærir nýja hluti. Var pínu stressuð að lesa fyrir hana kaflann þegar Maddit gekk eftir húsmæninum á skólanum. Hún virðist þó ekki hafa pikkað það upp ennþá. Hún elskar þó orðið drullusokkur sem hún lærði ásamt Betu í síðustu viku.

Við erum núna að verða búnar með Maddit og Betu. Þurfum að fara að finna nýja bók. Mig langar ægilega að lesa fyrir hana Ronju, en hún er víst ófáanleg á Íslandi. (Sem betur fer?)

Er þó nokkuð viss um hvaða orð verða í uppáhaldi ef sú bók finnst.

Sagt og sungið hátt og snjallt af barninu sem getur ekki sagt íslenskt R.

Setjið franskt R í staðinn fyrir það íslenska og endurtakið nokkrum sinnum:

Rassálfar og Rebekka Ræningjadóttir.

Fyndið Astrid? Fyndið?

...já, eiginlega. Drepfyndið.

Þar til næst..

p.s. ég ætla bara að sleppa því að lesa um Emil. Tek bara ekki sénsinn.

Áramótageit...

2012-01-03T17:41:00.001+01:00

.. frekar en áramótaheit. Því að á þessum bæ eru áramótaheit ekki strengd.

Ég veit ekki afhverju, en líklega tengist það óstjórnlegri og ótrúlega órökvísri hjátrú.

Ég er nefnilega þannig að það jaðrar við geðveiki þegar talið berst að hjátrú.

Er ótrúlega sannfærð um að ef maður strengir þessi áramótaheit, þá sé maður að búa sér til vandræði.

Á vinkonu sem sagði mér einu sinni að hún ætlaði aldrei aftur að lýsa því yfir að komandi ár yrði það best í heimi.. af því að árið sem hún gerði það, var árið sem allt beisiklý fokkaðist upp (pardon my language..).

Ég er því sannfærð um að það myndi gerast í mínu tilfelli líka.

Ef ég tildæmis myndi segja það opinberlega að ég ætlaði að léttast um 10 kíló á nýju ári, þá myndi ég líklega enda upp sem heimsins feitasta kona, búin að bæta á mig 320 kílóum á komandi ári.

Ef ég segðist ætla að byggja sumarbústað á ákveðnu ári, þá myndi bústaðurinn væntanlega breytast í ryðgað hjólhýsi frá 1974.

En ég er ótrúlega góð í forvörnum.

Ég hugsa að það myndi liggja sirka heilt kíló af salti á gólfinu í eldhúsinu hjá mér ef það væri ekki sópað reglulega. Því að eins og allir vita á maður að kasta salti yfir öxlina á sér ef maður missir niður saltkorn. Alltaf. Er samt ekki alveg viss út af hverju, en allur er varinn góður.

Held að það sé ekki til sá viður sem ég hef ekki barið í reglulega með ákveðinni tölurunu.

Fer ekki mikið undir stiga..og siga hundinum á alla svarta ketti í nágrenninu.

Óska samt ykkur öllum gleðilegs árs og gæfu á komandi ári... og að ykkur takist að ná öllum ykkar markmiðum strengdum á þessum áramótum.

Reyni kannski að venja mig af matvendni þegar kemur að geita-afurðum á árinu, samanber titilinn.. en lofa engu. Þetta er þvílíkur viðbjóður að það er engu lagi líkt.

Ef þetta væri formlegt áramótarheit, sem það er ekki, væri líklegt að ég myndi enda sem þræll á geitabúi í lok árs. Treysti á að það gerist ekki.

Sjö, níu, þrettán.

Þangað til næst..

Jóla(ó)undirbúningur.

2011-12-01T23:50:00.001+01:00

23 dagar til jóla og það gæti verið apríl fyrir mér.

Í alvöru. Er að missa stig úr jólahúsmæðrakeppninni hraðar en þú getur sagt whatshallmacallit.

Það er ekkert jólaskraut komið upp. Meira að segja fólkið við hliðina á okkur sem er korter í lummó og á ekki sjónvarp er búið að missa sig í úti-jólaskreytingum (með fullri virðingu fyrir fólki sem velur að eiga ekki sjónvarp með þrjú börn sem grenja í kór...). Gatan mín er farin að blikka en það er slökkt á númer 169. Grátlegt.

Rebekka tilkynnti mér áðan að hana langaði til að gefa jólasveininum föndrið sitt úr skólanum. Sá greinilega fyrir sér að hún væri lent hjá Skrögg-hildi Grámann þessi jól og að hún þyrfti að bjarga því sem bjargað yrði í hendurnar á einhverjum sem kynni að meta það.

Gleymdi að finna til súkkulaðidagatölin fyrir börnin mín í gær.

Er ekki búin að baka eina sort. Ekki einu sinni búin finna eina uppskrift. Ekki einu sinni búin kaupa tilbúnar smákökur.

Þetta er samt fullkomlega út úr karakter af því að ég hef svo æði oft algjörlega misst mig um jólin.

Hef bakað eins og brjálæðingur þannig að það mætti halda að það byggi hér 17 manna fjölskylda.

Þegar ég var gjaldkeri í litla Landsbankaútibúinu í gamla daga úti á Nesi, skreytti ég stúkuna mína. Ekkert svona pínu. Ég missti mig. Það var sería utan um glerið. Það var fyrir tíma samræmdra jólaskreytinga í bankanum.

Ég verð tiltölulega anal þegar kemur jólagjafinnpökkun. Gjörsamlega tapa mér. Pappír er ekki það sama og pappír gott fólk.. hvað þá slaufan og skrautið. Ég eyði venjulega vangefnum tíma í að finna út hvernig pökkunarþemað er hver jól (ég veit... pínu klikk) og öðrum eins tíma í að finna rétta skrautið.

Hef alltaf, (37 ár gott fólk), átt mitt eigið jóladagatal sem ég gúffa í mig eins og spenntur krakki á hverju kvöldi fyrir jól.

Ég trúi enn á jólasveininn.

En í ár. Ekkert. Ekki vottur af jólum. Zip.

Skil þetta ekki.

Kristján kemur heim á morgun og vonandi með jólaandann með sér. Hann er allavega búinn að lofa að baka Sörur í ár, en eins og allar góðar húsfrúr í Lúxembúrg vita, þá er hann Sörumeistari svæðisins.

Neyðaráætlunin verður sett í gang á morgun ef þetta lagast ekki. Elsku jólaandi. Drífðu þig bara í heimsókn. Ég lofa að taka þátt. Skal jafnvel skreyta húsið grænum greinum. Ég mun gera mitt besta í að drekka í mig jólaandann um helgina, set hreindýrahorn á hausinn og syng Jólahjól þar til ég verð rauð í framan.

Ef allt bregst mun ég eyða einhverjum tíma í IKEA þar sem jólin byrjuðu í október. Mér skilst að enginn sleppi þaðan ó-jólaður . Vika ætti að duga mér.

Þar til næst..

Dómsdagur með ostum.

2011-11-21T21:18:00.000+01:00

Já gott fólk,
það er komið að því.

D-day, dómsdagur, endalok alls þess sem er gott og sætt og ljúffengt í þessum heimi.

Á morgun verð ég sett eins og hamstur á hjól til þess eins að fá staðfestingu á því sem ég nú þegar veit.

Grátlegt líkamsástand mitt verður krufið til mergjar.

Hugmyndin er svosem góð og flest allir í vinnunni eru farnir að mæta þarna í veröld Satans. Á hverjum degi er alltaf einhver til fyrirmyndar og púlar sér út. Hjólar, lyftir, hleypur og lýgur því stanslaust að öllum sem heyra vilja hversu frábært þetta er.

Ok, fínt. Ég er alveg til í að vera með í klúbbnum, en það var áður en ég frétti það að til þess að mega fara í sturtu í þessum undirheimum Hadesar, þarf maður að undirgangast próf.

Ostaprófið. Sumir vilja kalla það fitubolluprófið, en hitt hljómar betur. Hvaða ostur ertu?

Á morgun er sumsé mitt próf. Framkvæmt af sadískum, hollenskum (sumir Hollendingar hata ennþá Íslendinga eftir Icesave og þessi flokkast þar undir) líkamsræktar-na####a.

Ég mun flokkast sem feitur gouda, og nota bene, gouda er til í allt að 48% hér í Lúx.

Finnst reyndar ótrúlega ómerkilegt af þeim sem skilgreindu fituskalann að búa ekki auka ramma á milli "average" og "obese". Hverskonar rugl er það? Já.. þú er svona í meðallagi.. en þú þarnað ógeðið þitt sem slysaðist einu prósenti hærra, þú ert bara obese! Ullabjakk!

Það er sumsé ég á morgun. Fröken obese.

Er núna að fara yfir litgreiningar palettuna til að finna út hvaða litur klæðir rautt best.

Ég nefnilega verð rauð í framan. Ekkert lítið sko. Heldur þannig að fólk stoppar mig gjarnan og spyr hvort að það sé allt í lagi með mig. Gerist á mínútu 3 og er hræðilegt. Fer á mínútu 300.

Hugsið tómat.
Teiknið á hann andlit.
Það er ég.

Það sem fylgir svona átaki gjarnan er síðan bætt mataræði. Hef svosem engar sérstakar áhyggjur þar. Er að borða viðbjóðslega hollt eftir að grænmetisvagninn hóf vikulega innrás sína.... en ég hef smá áhyggjur af namminu.

Ég var nefnilega á Íslandi.

Fór auðvitað í Krónuna og Bónus og keypti upp lagerinn af rauðum möndlum og hrískúlum.

Get ekki EKKI borðað það. Það væri bara móðgun.
Ekki er hægt að geyma það því að það stríðir á móti öllu sem ég hef tamið mér.
Og ekki er hægt að henda því (maður hendir ekki dýrgripum).

Vandamálið sem ég stend því frammi fyrir núna er eiginlega hálfgert keppnis.
Þarf hvort eð er að koma mér í keppnisgírinn.

Klukkan er núna níu um kvöld. Testið er klukkan tólf á morgun. Sem gerir 15 klukkutíma.

4000 hrískúlur og 2000 möndlur.

Babysteps...

Þangað til næst...

Ömmur

2011-11-03T17:18:00.001+01:00

Eitt af því sem er ekki sjálfgefið, er að fá að kynnast ömmu sinni.

Ömmur eru, skv. skilgreiningu minni, mjúkar konur á sál og líkama, sem hægt er að sækja óendanlega ást og visku til. Þær kunna allt. Þær kenna manni að leggja kapla og spila spil. Þær vita allt sem þarf að vita og meira til. Ég átti tvær ömmur, önnur dó þegar ég var 16 ára en hin daginn eftir 17 ára afmælisdaginn minn. Ég fékk því ekki að kynnast þeim með þeim hætti sem ég hefði viljað. Óteljandi spurningum er enn ósvarað, spurningum sem ég hafði ekki rænu á að spyrja fyrir sautján ára aldurinn.

En af hverju er ég að skrifa um ömmur? Jú, af því að fyrir stuttu dó ein amma. Ekki amma mín, heldur amma hennar Auðar vinkonu minnar. Ég og Auður vorum bestu vinkonur í MR og höfum haldið vinskapnum áfram, þrátt fyrir að það líði núna lengri tími á milli þess sem við hittumst. Ein í Lúx og hin í Köben. En ég var líka vinkona ömmu hennar. Amma hennar hét einnig Auður og var kjarnakona. Hún vann á sínum yngri árum í Landsbankanum og þannig fundum við samnefnara okkar. Og svo vorum við auðvitað báðar miklar vinkonur dótturdóttur hennar og aldursbil var ekki til.

Hún kom ósjaldan og kíkti á mig þegar ég vann í Landsanum. Hún var með sterkar skoðanir á því hvernig hlutirnir ættu að vera, hún var stolt af mér, gaf mér góð ráð og mér fannst óendanlega gott að knúsa hana þegar ég hitti hana. Hún hafði alltaf áhuga á því sem ég var að gera og ég veit að hún fylgdist með mér eftir að ég flutti út. Hún var þessi eiturhressa týpa sem var algjörlega "on top of things". Það var ekkert sem hún var ekki með á hreinu. Hún var einstök. Hún var holdgervingur Ömmunnar.

Ég er óendanlega þakklát fyrir að hafa kynnst henni.

Legg til að þið knúsið ömmurnar í kringum ykkur...

Þar til næst..

p.s. ykkur er alveg óhætt að knúsa afana líka....

Ísland, sækjum það... með ferðatösku og yfirvigt!

2011-11-01T12:48:00.000+01:00

Það stefnir í Íslandsferð hjá frúnni.

Sem í flestum tilfellum þýðir yfirvigt á leiðinni tilbaka.

Yfirvigtin splittast í tvennt. Hluta af henni ber ég innanklæða, réttara sagt innvortis eftir ofát og belgingu vambar á tímabilinu. Síðan er hinn hlutinn sem er klárlega ekki minna mikilvægur.

Birgðaflutningur.

Fyrir þau ykkar sem haldið að allt fáist í útlandinu, skal það hér með leiðrétt. Það er rangt.

Helstu útflutningsvörur eru eftirtaldar:

Cheerios.
Efst á listanum. Þetta stöff er eins og gull. Höfum átt viðskipti með þetta hér úti. Á meðan hlutabréfavísitölur heimsins hríðféllu, stóð Cheeriosið óhaggað. Fæst ekki úti nema með sykurhúð helvítis.

Royal búðingur.
Þarf eitthvað að útskýra þetta? Hvernig á maður að neita börnum sínum um hlut sem geimvísindalega sannar að hamingju er að finna í skál?

Rauðar möndlur.
Það þarf þó að vanda sig við þennan lið. Hef Freyju menn grunaða um að setja gölluðu, allt-of-linu, möndlurnar í risa poka og selja í fríhöfninni. Hef nokkrum sinnum talið mig vera komna til himna, með slíkan risapoka læstan á milli krumlanna. En vonbrigðin hafa verið í réttu hlutfalli við stærð pokans. Linar og lélegar. Ég ét þær nú samt... maður hendir ekki svona hlutum, en rétta aðferðin er að kaupa litlu pokana (sem fást ekki í flughöfninni) og pakka þeim áður en farið er af stað. Bara nógu marga pakka.. með grjóthörðum og dásamlegum möndlum.

Hrískúlur frá Freyju.
Dásamlegt stöff. Er viss um að þær eru sannanlega í boði á himnum. Fullkomið jafnvægi milli hrískúlu og súkkulaðis. Ekki þessi súkkulaðihryllingur sem er í boði í hjá N&S. Erum ekki sammála þarna hjónin (frekar en oft áður).. þar sem hann er aðdáandi nóakroppsins. Éttu þá bara þitt stöff sjálfur vinur og láttu mitt í friði!!!

Hangikjöt og flatkökur og skyr.
Besta máltíð í heimi. Þarf smá lagni til að koma skyrinu ósködduðu.. en það er sko samt hægt. Erum ókrýndir meistarar í skyrútflutningi. Skil ekki afhverju við erum ekki á opinberum lista yfir útflutningsaðila skyrs.

..og þá er það cirka komið. Auðvitað dettur ýmislegt í töskuna.. en þetta eru lykilatriðin að hamingjunni í Lúx. Minni alla þá sem hyggja á heimsókn til okkar að athuga birgðarstöðu heimilisins í samræmi við ofangreint og koma okkur á "óvart..".

Þess á milli verður maður bara að láta sér nægja annars flokks mat. Í alvörunni, hver lifir af gæsalifur, strútskjöti, ostrum, ostum og sniglum einum saman?

Þar til næst..

Morgunstund gefur gull í ..? hvað? ekkert!

2011-10-19T20:48:00.001+02:00

Fyrir ykkur óþolandi morgunhanana er best að hætta hér. Takk fyrir lesturinn.

En fyrir hin ykkar sem eruð með mér í liði, þá er þessi pistill tileinkaður okkur sem finnst lífið betra.. eftir hádegi.

Ég veit ekki alveg hver byrjaði á þessu rugli, að rífa fólk upp á rassgatinu í morgunsárið og henda því út í náttmyrkrið. Ég meina, afhverju ekki að bíða eftir birtunni? Er það eitthvað verra?

Ég veit líka að ég er ekki ein í þessu. Ég á tildæmis bróður sem hefur séð sólarupprás bara af þeirri einföldu staðreynd að það birtir ekki fyrr en um 11 leytið á Íslandi á veturna.

Var ég ekki líka örugglega búin að minnast á að ég er gift Kristjáni. Hafið þið hitt Kristján?

Morgunglaðari persónu er líklega ekki hægt að finna. Finnst trúlegt að nokkrir fuglar, hérar og íkornar úr Disney flögri, hoppi og skoppi í kringum hann á morgnanna (á meðan ég lúri ásamt hinum illfyglunum úr sömu verksmiðju). Hann er þessi ótrúlega hressa týpa og tilbúinn í daginn. Og svo þarf hann ótrúlega mikið að tala. Er eiginlega ekki að meika það. Sé ekki tilganginn með því að eiga samtal við yfirhöfuð einhvern á morgnanna. Ég held því raunar fram að það sé ekki hægt að segja neitt gáfulegt á morgnanna, nema að maður sé hreinlega að lesa upp texta sem var skrifaður kvöldið áður. Því er best að þegja.

Besta morgunsamband sem ég hef átt var veturinn þegar Gunni bróðir var í Stýrimannaskólann og ég í MR. Fékk iðulega far með honum á morgnanna. Það fyrsta sem var umlað út úr sér var jafnframt það síðasta. Nokkurs konar ígildi kveðju þegar rennt var upp að Menntaskólanum. Fullkomið. Fullkominn skilningur beggja aðila.

Á morgun þarf ég svo að vakna ógeðslega snemma. Sirka kl. 6.15. Það er nefnilega afmæli á heimilinu þegar hin yndislega en jafnframt morgunfúla barnið mitt hún Rebekka verður 6 ára. Hún er eins og ég: getur-ekki-opnað-augun.

Nema þegar hún á afmæli. Þá vaknar hún eldsnemma og vill fá pönnukökur.

Og hún fær þær.

Jafnvel þótt móðirin muni líta út eins ofnbakaður karfi sem enn hefur ekki opnað augun, þar sem hún ráfar um í eldhúsinu með spaðann að vopni og reynir að blanda hráefnunum saman með hálfa meðvitund.

Fer snemma að sofa í kvöld.

Þar til næst...

Innrás Smjattpattana..

2011-10-11T22:02:00.001+02:00

Þegar ég var lítil elskaði ég Smjattpattana. Söng hástöfum með og fílaði þetta í botn. Fannst Lúlli laukur fyndinn en Pála Púrra eitthvað hálf misheppnuð. Ég kunni líka Grænmetisvísuna úr Dýrunum í Hálsaskógi utan að.

Í stuttu, ég kunni öll lög um grænmeti sem voru í boði en heilaþvotturinn virkaði illa. Var ekki alveg að fíla að borða þetta. Einbeitti mér frekar að kókópöffsi og kókómjólkinni (með tilheyrandi afleiðingu, I do realise...).

Ég hef þó á síðari árum lært að meta þetta græna. Finnst það eiginlega bara orðið nokkuð gott. Er líka svo ægilega meðvituð eitthvað um hollustuna að mér fannst tilvalið að gerast áskrifandi að bíóvænni grænmetiskörfu vikulega. Tók bara samt minnsta skammtinn, svona á meðan ég væri að prófa.

Í hverri viku streymir því inn á heimilið, fyrir 18 Evrur eða svo, heill helvítis hellingur af þessum fjanda.

Í alvöru. Það er einhver takmörk fyrir því hvað hægt er að upphugsa af uppskriftum. Var með 7 kúrbíta í grænmetisskúffunni í dag, eldaði úr fjórum þeirra. Geri aðrir betur.

Spínat einhver? Hnúðkál? Radísur, Hokkaido grasker, maísstönglar (með hýðinu og alles) eða lauk? Sveppi eða salathaus? Tómat og púrrulauk. Eggaldin..?

Vanþakklæti hugsa örugglega einhverjir núna. Á meðan Ísland flytur inn "ofurþroskað" grænmeti vogar hún sér að kvarta.

Ekki misskilja. Ég var geðveikt spennt í byrjun. En þegar að heimilið sem hatar paprikur fékk 5 stykki á 8 dögum þá þarf eitthvað að endurhugsa þetta. Og mér finnst meira að segja gaman að elda. Búin að elda fennel pasta, fennel fisk og fennel pasta aftur. Það var kúrbítsofnréttur í matinn í kvöld. Brokkólísúpa í síðustu viku og graskerssúpa þar áður. Búin að súrsa paprikur (fyrir Raclette seasonið skiljiði..). Ég elda og elda eins og skrattinn sjálfur sé á eftir mér, en það sér ekki högg á vatni. Og á hverjum þriðjudegi bætist við.

Vil ekki gefast upp á þessari hollustu, en ég held að herra google sjálfur sé orðinn leiður á þessu. Er búin að gúggla allar grænmetisuppskriftir algeimsins.

Ekki einu sinni reyna að benda á frystinn. Það kemst ekki meira inn í hann. Ekki ein baun (bókstaflega).

Ætla að halda áfram aðeins lengur, en ef ég sé bangapabba koma raulandi: "Gott er að borða gulrótina.. grófa brauðið steinseljuna.." þá er jafnlíklegt að ég dúndri í hann graskerinu og troði uppí hann gulrótunum og að ég taki undir sönginn..

Þar til næst...

p.s. í ískápnum eru núna eftirfarandi hlutir, óeldaðir:

Hokkaido grasker
kúrbítar
sveppir
púrrulaukur
tómatar
nokkrir maísstönglar
eggaldin
salathaus
risaskammtur af risaspínati
gulrætur
agúrka
steinselja
laukar, gulir og rauðir
hnúðkál

Uppskriftir óskast...

Eiginkona ársins!

2011-10-05T12:38:00.001+02:00

Rekur nú væntanlega einhvern í rogastans.

Ekki láta þó titilinn blekkja ykkur, þar sem hér á eftir fer (ekki) lofsöngur um síungan eiginmann minn sem á, ótrúlegt en satt, afmæli í dag.

Kristjáni er margt til lista lagt eins og flest ykkar vita. Hann er frábærlega skemmtilegur félagi, æðislegur kokkur, skemmtilegur pabbi , uppáhaldstengdasonur (ekki fleiri til...) og svo auðvitað augasteinn móður sinnar.

En af því að mér finnst skemmtilegra að benda á hina hliðina, þá skulum við rétt aðeins staldra við.

Þegar ég fyrst kynntist Kristjáni þá tilkynnti hann mér að þetta væri útúrpælt hjá honum að yngja upp strax (!) Svona eins og að það ætti að veita mér einhverja tryggingu.

Í dag er hann þó hlutfallslega minna eldri en ég heldur en hann var fyrir 13 eða fjórtán árum síðan (voru það kannski fimmtán? man aldrei hvaða ár við hittumst, þarf alltaf að spyrja Roald..). Hann hefur jafnframt eitthvað yngingarelement við sig og er nokkuð naskur á að velja sér ekki svona "gömlu karla föt", þannig að gífurlegt aldursbilið er ekki að trufla mig, ennþá.

Talandi um föt. Kristján er þessi týpa sem elskar einkennisklæðnað. Hann hefur ótrúlega þörf fyrir að eiga átfittið í öllu því sem hann tekur sér fyrir hendur, jafnvel þó um sé að ræða tímabundið áhugamál. Skátarnir, golfið, skíði, hjólreiðar og hlaup. Mamma hans sagði einu sinni að Kristján hefði sómt sér vel í hernum (hjálpræðis?) af því að hann elskaði einkennisbúninga... Greyið hefði bara átt að læra á lúður, þá hefði hann verið set for life hérna með Lúxembúrgísku lúðrasveitinni. Þeir eru í svaka júniformi og spila reglulega í götunni hjá okkur.

Ef hann hefði lært á lúður þá hefði hann ekki heldur þurft að læra neina texta (erfitt að blása og syngja). Kristján kann nefnilega enga texta. Þá meina ég enga. Ekki einu sinni textann við „Góða mamma..“ sem ÖLL börn á Íslandi læra fyrir 6 mánaða aldur. Þetta er eiginlega magnað, sér í lagi af því að það virðist á engan hátt halda honum frá því að syngja með. Hátt. Hann er líka sonur hennar Lallý sem syngur þindarlaust, en munurinn er sá að hún kann texta. Það eru þó helst textar með Britney Spears sem virðast síast í gegn hjá drengnum, en þar komum við að næsta elementi.

Píkupopp. Frá helvíti. Kristján elskar þær allar. Hvort sem þær heita Britney, Rihanna, Pink eða Katy. Hann elskar þær skilyrðislaust. Og kann hluta úr viðlögunum. Veit ekki hvað þetta er, en stundum hef ég pínu áhyggjur.

Hann er nefnilega sirka alltaf 23 ára í anda. Rétt eins og forgjöfin hans í golfi.

Sem gerir mig 14 árum eldri en hann... ætli hann sé ekki örugglega búinn að gleyma þessu með að yngja upp?

Til hammó með ammó.. elsku gamli kall...

Þar til næst...

Móðir ársins..

2011-10-03T21:05:00.002+02:00

Þegar kemur að barnauppeldi er ég margfaldur handhafi titilsins "Móðir ársins". Hef einnig samtvinnað það titlinum "húsmóðir ársins" þegar ég ræktaði milljarða af litlum pöddum í eldhúsinu.. en það er önnur saga.

Ég er þó ekki viss um að börnin mín hafi verið spurð álits... þ.e. þetta með móður-titilinn.

Fyrir utan smáatriði eins og að:

týna Rebekku í Maastricht
vera spurð að því á leikskóla þegar ég sótti barnið mitt hvort ég væri skyld því og mætti sækja
muna ekki hvort börnin mín hafi fengið hlaupabólu
gleyma að senda inn sjúkrakortið í skólann og fá skammir fyrir
finnast iðulega allt fyndið sem þeim finnst hræðilegt, eins og þegar þær breyttust útlitslega í skrímsli, báðar tvær í síðustu viku..

..þá tókst mér núna að gleyma að fara með Gabríelu í bólusetningu. Fór með hana til læknis fyrir viku og spurði lymskulega hvort hún gæti ekki þrumað í hana eins og einni bólusetningarsprautu þar sem við hefðum átt að koma með hana í sprautu 2 af 3 í lok ágúst. Fékk stíft augnaráð frá lækninum sem stundi og tjáði mér að þetta væri hið alvarlegasta mál. Þetta væri bara næstum allt of seint. Tók síðan nokkrar sekúndur í að stara á mig, en ég starði bara á móti. Síðan henti hún mér út og skipaði mér að panta tíma hjá sér í snarhasti. Sem ég og gerði.

Mánudagur kl. 9. (heilinn: þriðjudagur kl. 9). Heilinn hjá mér ákvað sumsé að þetta væri á þriðjudegi.

Fékk síðan símtal í dag frá Gabý (hvað var ég að spá þegar ég lét hana fá gemsa?):

"Mamma". "Er þetta að segja þér eitthvað: læknir..sprauta..mánudagur..?"

Hún talaði við mig í tón sem gaf í skyn að móðir hennar væri fæðingarhálviti.

"Litli rugludallurinn minn. Þú hefur rangt fyrir þér. Þú ert nú aldeilis að rugla litla ruglukellingin mín. Mamma veit best. Þetta er á morgun."

Ég ætla ekki að lýsa næsta símtali sem átti sér stað eftir að hún fann miðann þar sem að tíminn stóð samviskusamlega skrifaður á.

Móðir ársins.

Er núna búin að fá nýjan tíma og Gabríela skrifaði það samviskusamlega inn á dagatalið. Hún andvarpaði líka stundarhátt og leit á systur sína. Veit hvað hún var að hugsa.

"Eins gott að ég er hérna greyið mitt. Þetta er allt að fara í rugl."

Þar til næst...

Golf or not to golf.

2011-09-28T22:39:00.002+02:00

Fyrir þá sem mig þekkja, vita þeir að ég er ekki sleipur golfari. Eiginlega bara "ekkert" golfari. Hef samt farið í golf ferð og allt. Er bara einfaldlega virkilega lélegur golfari.

Þetta er ekki einu sinni svona hógværð. Ef ég væri góð myndi ég syngja það af fjallstoppunum (eða svona meira af hæðinni hér í Lúx). Það bara er ekki málið. Ég hef ekki tölu á því hversu oft ég hef þurft að setja X í staðinn fyrir töluna (nú taka allir golfarar andköf því að það þýðir fyrir ykkur hin sem hafið ekki hundsvit á þessu að höggin eru orðin fleiri en tíu á holunni......). Mér er ekki eiginlega ekki viðbjargandi.

Man samt að ég átti (fyrir þúsund árum) svona byrjendaheppnisár. Man sérstaklega eftir því að hafa verið sterkari en Hugi, vinur okkar Kidda, eitt árið. Sama ár og jörðin skalf á Selfossi. Líklega 2000. Það ár er held ég ekkert á leiðinni aftur. En það var samt svona næs móment.

En afhverju að rifja þetta upp núna. Jú, af því að hvað gerir sá sem er svo óhugnarlega lélegur í golfi að réttast væri að sá aðili myndi skammast sín og gefa golfsettið.. jú, sá aðili skráir sig í golfmót.

Eina sem getur réttlætt þessa ákvörðun mína er að það eru verðlaun fyrir flestu höggin. It's got my name on it!!

Veit í alvöru ekki hvað ég var að hugsa, en ég veit að það er of seint að bakka út úr þessu.

Síðan eru líka veitt verðlaun fyrir flottasta golfdressið, en seriously fólk. Þetta er í Lúxemborg. Ég á ekki séns í helvíti á móti úberskvísunum hérna. Ég á ekki einu sinni golfbuxur.. Hvað er það?

Treysti samt á Guð og lukkuna á föstudaginn. Mun sveifla kylfufjandanum eins og brjálæðingur á sterum og loka augunum í eitt andartak og vonast til að hitta helvítis kúluna.... í sirka rétta átt.

Líklega buxnalaus.

Þar til næst..

Twentyfourseven?

2011-09-26T20:54:00.002+02:00

Einu sinni hélt ég að allt væri fullkomið í útlöndum. Að öll framfaraskref sem tekin væru á Íslandi væru að fordæmi einhverra annarra. Getur svosem vel verið, en þeir sem tóku þau skref voru ekki að horfa til Lúxemborgar. Svo mikið er víst!

Ekki það að allt sé betra á Íslandi, ónei.. en sumt, já sumt mættu Lúxararnir alveg taka sér til fyrirmyndar.

Á laugardaginn var ákveðið að fara með Gabríelu upp á spítala þar sem hún leit út eins dalmatíuhundur, nema með rauða flekki í staðinn fyrir þá svörtu, og varirnar á henni voru skyndilega orðnar svo útblásnar að Angelina Jolie hefði skammast sín niðrí tær!

Eftir 3 tíma bið á spítalanum var loks komið að henni (já ég veit, þetta er alveg eins og Íslandi, bíðið bara aðeins..) og eftir skoðun hjá útúrþreyttum lækni var niðurstaðan: "Urticaria". Það útleggst á íslensku "bráðaofnæmi eða ofsakláði", skv. doktor.is

Og þá var það apótekið. Einmitt. Lyf og heilsa? Opið 24/7?

Nei.

Aldeilis akkúrat ekki.

Apótek eru auðvitað bara opin frá 9-6 virka daga og 9-12 um helgar. Afþví að þá verður fólk veikt.

Af góðmennsku sinni ákveða Lúxarar þó að hafa kannski eitt opið í borginni á öðrum tímum. Já þú last rétt: EITT. Þegar þú ert síðan búin að versla lyfin (eftir ca. klukkutíma bið) þá þarftu að borga aukalega 5 evrur í sérstakt utan-venjulegs-opnunartíma-gjald. Gjaldið hækkar síðan í 10 evrur ef það er stórhátíð. Yep, er ekki að ljúga. Halló 1982.

Að Gabríelu er það svo að frétta að hún lítur ennþá út eins og blettatígur, en þetta getur víst varað í marga marga marga daga... Ofnæmispróf verða heldur ekki framkvæmd nema að þetta komi fyrir aftur.

Rebekka reyndi að vera með í útlitsstemmingunni og fékk moskító til að bíta sig í andlitið. Hún lítur núna út eins og Mickey Rourke.. öðrum megin. Er nokkuð sæt hinum megin..

Þar til næst..

og?

2011-09-20T23:34:00.002+02:00

Hvernig byrjar maður að blogga aftur?

Þarf samt að laga helling til, linkar breyttir.. búnir.. eitthvað...

Sjáum til. Kannski gerist eitthvað...

Skíði - 8mín.

2010-02-22T07:53:00.002+01:00

Íslensk bankakona gripin við þjófnað í Lúxemborg!

2009-06-12T17:13:00.002+02:00

Þetta gæti alveg verið fyrirsögn í anda DV og gulu pressunar hér í Lúxemborg. Ekki nóg með að þjófurinn væri í Lúxemborg (land sem er annálað fyrir að aðstoða fólk við að stinga undan fjármunum), bankakona (þarf að segja eitthvað meira um þá? Bankamenn eru náttúrulega síðasta sort í dag) og íslensk (þar fórstu alveg með það… Íslendingar eru náttúrulega algjörlega eitraðir í dag), þá væri líklega það eina markverða við söguna að hún hefði verið gripin. Sem hún var ekki.

Fékk sumsé hland fyrir hjartað í dag þegar ég var stödd inn í Promod að máta föt í hádegishléinu mínu.

Var búin að máta ýmislegt, ýmsar stærðir, ýmsa liti og ýmsar samsetningar. Oft. Fór nokkrum sinnum í mátunarklefann og var orðin algjörlega rugluð, en engu að síður staðráðin í að eyða peningum í dag.

Tel mig vera komin með ágætis eyðsluskammt og flýti mér í átt að kassanum með fangið fullt af fötum. Jakki, leggings, kjóll og bolur. Þetta stefndi allt í að konan yrði helv.. hugguleg, ný klipping, ný föt og helgin framundan.

2 skrefum frá kassanum sé ég beltarekkann. Endilega. Vantar belti, kannski nokkur. Tek í eitt beltið og legg það upp að mjöðminni til að sjá hvernig dýrlegheitin fara mér.

Og frýs.

Uppgötva mér til mikillar skelfingar að ég er í einum að mátunarbolunum undir mínum bol. Alveg eins og ekta búðarþjófur.

Þeir taka hart á búðarþjófum hér í Lúxemborg sem og annarsstaðar.

Winona Ryder fékk tildæmis varla hlutverk í bíómynd eftir að hún var gripin.

Kona var dæmd í 4 mánaða fangelsi í Reykjavík fyrir búðarþjófnað.

Finnst trúlegt að í einvherjum löndum séu hendur hoggnar af og fólk jafnvel líflátið.

Og þarna stóð ég í bolnum undir öðrum bol.

Fékk hjartaáfall, henti mér í biðröðina að mátunarklefanum, þóttist vera ógeðslega bissý í símanum svo ég yrði örugglega ekki gripin af búðarþjófnaðarlöggunni og sá líf mitt í renna fram hjá í röndóttum búning.

Röndótt fer mér bara ekki vel.

Tók trú, bað alla vætti um að vaka yfir mér á þessari þrautargöngu í mátunarklefann og henti mér síðan úr bolnum í snarhasti.

Keypti auðvitað bolinn líka.

Mun hér eftir aldrei máta föt aftur í búðum (eða þar til næst).

Er enn með hjartslátt sem heyrist líklega til Íslands.

Þarf örugglega nokkur hvítvínsglös þegar ég kem heim...

Það er nokkuð augljóst...

2009-02-08T21:15:00.003+01:00

Að ég er latasti bloggari í bloggheimum...

Þessvegna er núna smá frí.. vegna leti.

Hinsvegar sett ég smá link hér til hliðar sem vísar í myndir. Þar mun ég henda inn myndum af og til, en af því að ég er svo óendanlega löt (ekki bara í blogginu sko) þá nenni ég ekki að taka til í þeim í augnablikinu. Það fer bara allt inn. Ef þið nennið ekki að skoða allt, þá bara sleppið þið því :O)

Verið margblessuð og sæl...

luv
slauga

Gleðileg jól!

2008-12-24T18:44:00.002+01:00

Af jólatrjám og öðrum ósóma...

2008-12-15T22:15:00.007+01:00

Góða kvöldið gott fólk!

Eftir langt blogghlé ákvað ég að nú væri tími til kominn að smella einhverju fram. Þetta helgast kannski af þessu súra ástandi sem hefur ríkt hér í Lúxemborg að neistinn var ekki alveg í gangi hvað varðar skriftir. Sumir létu sér vaxa skegg. Ég hætti að skrifa ! :O)

Í dag náði þessi rússíbani ákveðnum endalokum þegar að öllum samningum við starfsmenn var sagt upp og einhverjir endurráðnir í framhaldi af því. Til að gera langa sögu stutta er ég að vinna áfram en það lýtur út fyrir það að maður sjái á bak vinnufélögum og vinum í kjölfar þessa dags. Úff.. en sá dagur!

Ákváðum síðan að kýla í okkur smá jólaanda eftir daginn, og drógum upp jólatréð sem við völdum um daginn í jólatréskóginum. Það jólatré er í raun sérhannaður árásarbúnaður, búinn
eiturhvössum nöglum í stað barrs og hefur það aðeins eitt markmið. Að meiða litla putta (og stóra). Náðum um tíma að yfirbuga það, hentum á það ljósaseríu og skrauti, komum því fyrir út í horni og horfðum stolt á. "Ógurlega fallegt tré og vel valið hjá okkur, hugsuðum við örugglega öll." Það dugði í 5 mínútur, þá gafst tréð upp og með hljóðu öskri réðst það á gólfið og henti af sér skrautinu og hellti vatni um allt gólf. Helv.. tré!

Tróðum kvikindinu aftur ofan í fótinn, heilu viskastykki með, þvinguðum það með öllu afli til samstarfs og hótuðum því öllu illu. Smellti af því mynd til að eiga allavega sönnun fyrir því að það hefði einhverntíman staðið upprétt! Tréð stendur þarna enn.. starir á okkur og virðist alltaf vera á leiðinni aftur á gólfið en ég er nokkuð viss um að það bíður næturinnar til að ná fram hefndum. Grenihrífan þín..

Af öðru jólalegu má meðal annars nefna jólatónleika ILS (skólinn hennar Gaby) en þar var hún að sjálfsögðu að syngja með bekknum sínum.

Það ætti að grilla í hana ef vel er að gáð...

Eyddum helginni annars með skemmtilegu fólki, vorum á föstudagskvöld í mat hjá Krissa og Rúnu, Elsa og Nonni komu líka og við borðuðum saman og spiluðum síðan Scattegories. Það er skemmst frá því að segja að ég var vinsamlegast beðin um að mæta ekki með Kristján aftur í þetta spil. Fyrir þau ykkar sem hafið ekki spilað þetta, þá mæli ég með þessu... verið bara viðbúin í geðveikislegar rökræður ef þið bjóðið Kristjáni í með....

Fórum síðan í laufabrauðsútskurð hjá Skúla og Helene á sunnudag þar sem dömurnar sýndu listir sínar með hnífana. Þriggja ára með svisseskan vasahníf...? Er eitthvað að því?

Jæja gott fólk, hef þetta ekki lengra í bili, það má ekki ofgera hlutunum.

Jólaundirbúningskveðjur frá Lúx,

slauga og co.

Afmælisbarn dagsins..

2008-10-20T09:52:00.004+02:00

..er Rebekka!

Krúsídúllan sú arna er nú orðin 3 ára og hélt upp á afmæli sitt með pompi og prakt í gær!

Fékk vini sína í heimsókn og reif af þeim pakkana þegar þeir birtust í dyragættinni... einstaklega vel upp alin ung dama!

Fær síðan að opna restina af pökkunum sínum í dag þegar hún kemur heim. Þá höldum við "annað" afmæli :O)

Set inni myndir fljótlega.. þetta er í smá hönk gott fólk... þetta með myndirnar, en það hlýtur að fara að reddast!

luv
slauga og co.

Praktískar upplýsingar..

2008-10-10T15:39:00.001+02:00

Daginn!

Hér er allt við það sama að frétta. Vildum bara koma á framfæri nýju símanúmeri hjá mér, ..ef ske kynni að það yrði lokað fyrir þetta gamla!

Nýi gemsinn minn er +352 621 777 084

Vildum síðan benda ykkur sem hafið veri að reyna að hringja í okkur frá Íslandi í gemsana okkar að við erum með íslenskt númer. Það er mun ódýrara! Þannig að þið sem viljið bjalla þessa síðustu og verstu daga, hringið þá frekar í 562 3121. Ekkert svæðisnúmer og ekkert vesen, bara einfalt og gott íslenskt númer. Áfram Ísland!

Elskum ykkur öll...

kv
slauga og co.

Fréttir

2008-10-08T09:23:00.005+02:00

Hæ,
langaði bara rétt að láta ykkur vita, í tilefni af því sem er að koma í ljós, að það er í lagi með okkur. Í alvöru.

Hvað verður vitum við ekki ennþá en það kemur í ljós...

Vildi bara láta ykkur vita.

Sest niður eitthvert kvöldið í vikunni og skrifa ítarlegri fréttir af okkur.

kv
slauga og co.

Á Íslandi..

2008-09-18T20:50:00.001+02:00

..er síminn hjá Kristjáni 841-0373.
Minn er lúxneskur.. +352 621 199 099 (geri þó ráð fyrir að ég sé í seilingarfjarlægð frá drengnum..)

kv
slauga

Að læra að ganga upp á nýtt..

2008-09-13T12:50:00.003+02:00

..er örugglega ekkert líkt því að skipta um tölvu, en mér datt bara engin önnur fyrirsögn í hug sem lýsir betur frústrasjónum síðustu daga!

Við vorum sumsé að skipta um tölvu. Hin, sem er eins og dauðvona gamalmenni, hangir ennþá á horriminni, með ónýtt diskadrif og bilaða nettengingu. Það var því ákveðið að skipta út og fara í "hinn heiminn". Makkintoss. Eitthvað sem ég hef hingað til tengt við nammidós á jólunum.

Í alvöru, þá er þetta ekkert grín. Slaufa hér og slaufa þar... kræst! Allt átti að vera eitthvað svo "plug and play.." en er það einhvernveginn ekki!

Við náðum loks að taka tónlistina yfir, erum að fá taugaáfall yfir tölvupóstinum (Entourage) og myndirnar eru bara geymdar á harða diskinum um sinn. Það verða því engar myndir eða vídeó í bráð á meðan við lærum betur á gripinn.

Hún er samt ægilega falleg þetta krútt.. eitthvað svo elegant og lekker.. en samt eitthvað svo glötuð ;O)

Á samt örugglega eftir að verða uppáhaldsvinkona okkar bráðum. Þegar allt virkar. Ekki fyrr!

Af familíunni er hins vegar allt gott að frétta. Skólinn hjá Gaby er byrjaður, nóg að gera og skriðdrekinn er að sjálfsögðu á fullu í leikskólanum. Hún (þ.e. skriðdrekinn) veiktist um daginn og uppgötvaði sælu þess að hanga heima á daginn. Hún byrjar því núna alla daga á því að tilkynna manni að hún sé "asin" (lasin). "é ekki leika Louise". Erum ekki búin að átta okkur á því hvort að Lousie sé svona mikið hrekkjusvín að það borgi sig að vera meldaður veikur heima, eða hvort þetta sé ein fóstran sem reynir að aga drekann til. Spurning..

Annars eru góðir gestir í Luxembourg þessa dagana, en Óla og Hannes mættu á svæðið með Pétur Kára og Atla Hrafn. Æðislegt að sjá drengina (og auðvitað foreldrana) eftir langan tíma! Þau gista hjá Birgi Leifi og Betu en við fáum að stela þeim smá ;O) Ætlum með þeim út að borða í kvöld ásamt Sigþóri og Lindu á Apóteki okkar Lúxara. Fórum til Nancy í gær og dáðumst þar að torgi Stanislas . Örkuðum um nærliggjandi garð og héldum síðan heim á leið...

Ekki meira í bili. Passið ykkur á commentakerfinu. Það bítur...

luv
slauga

aðeins meiri málning..

2008-08-29T19:59:00.005+02:00

..æ, bara eitt smá í lokin, síðan lofa ég að hætta þessum málunarbloggum..

Trallerí...

slauga

Tuscany..

2008-08-17T19:51:00.005+02:00

..var dásamleg.

Vorum viku í húsinu, eignuðum ítalska vini í næsta húsi, drukkum ítölsk vín og borðuðum auðvitað pasta með. Hvað vill maður meira?

Barga var frábær bær, lítill og "næstum" ósnortinn af túrismamenguninni. Fórum til Flórens og áttuðum okkur þá á andstæðunum. Nenni samt eiginlega ekki að blogga um ferðina, aðallega vegna þess að við vorum að klára að gera ferðabókina á mypublisher. Ef þið viljið skal ég senda á ykkur linkinn af bókinni og þá getið þið flett í gegnum ferðina :O) Hendið bara inn komment eða sendið mér meil á seg@mmedia.is og þá sendi ég þetta þegar bókin er reddý (ætti að vera snemma í vikunni).

Fengum vini okkar í mat í gær og tókum spilakvöld. Einn gesturinn var eftir, hún Júlía dóttir Sigþórs og Jönu og í dag kepptust stelpurnar við mála ódauðleg listaverk. Hér eru nokkrar myndir:

Gabríela og eitt ódauðlegt verk fullunnið..

Júlía að byrja á mynd:

Ungur og upprennandi listamaður... málverkin eru til sölu gegn vægu gjaldi:

Hef ekki hugmynd um afhverju þetta kemur í svona undarlegu layouti hér á blogginu..c'est la vie!

Jæja, bara stutt núna, þori ekki öðru eftir að mágkona mín ein ágæt hraunaði yfir mig í símann áðan um bloggleti! ehemm...

Man ekki hvort ég var búin að blogga um það, en við komum heim í stutt frí þann 18.-28.september! Hlökkum mikið til!

Allavega, algjör leti í gangi núna af minni hálfu, nenni ekki að skrifa meir í bili.

bæjó,

slauga og co.

Uppgefin..

2008-07-27T18:23:00.016+02:00

..ekki vegna andlegra þrenginga eða bölsýniskasta, heldur fór þriggja manna fjölskyldan í hjólaferð í dag. Netta 4 klukkutíma!! Sannfærðist enn og aftur að líkamsástand mitt er ekki upp á marga fiska (reyndar hræðilega marga ef notast er við einfaldan útreikning..) !! Nokkrir svona hjólatúrar í viðbót og bingó! gæti líklega farið að vinna sem módel!

En nóg um slíkar hryllingsmyndir, nóg er að gerast á næstu dögum og verður farið stuttlega yfir það hér!

Sáum reyndar eitt pínu fyndið í hjólreiðatúrnum, risa rúta hafði ákveðið að stoppa á bensínstöð og bílstjórinn áttaði sig ekki á því að það var smá "brekka" í útafkeyrslunni. Rútan var sumsé pikkföst.. og ég náttúrulega greip símann og smellti af einni mynd:

Eftir 2 daga koma mamma, pabbi og Gabríela! jibbíjei!! Það verður æðislegt að fá skvísuna aftur og auðvitað frábært að fá mömmu og pabba í heimsókn. Erum síðan búin að leigja hús í Toscana héraði á Ítalíu og ætlum að dvelja þar í eina viku! mmmm.... það fjúka engin kíló í þeirri viku, það er alveg á hreinu, Ítalir eru víst ekki þekktir fyrir vondan mat eða vond vín...

Dólum okkur svo rólega tilbaka og reynum að finna einhver B&B á leiðinni. Gerum ráð fyrir að vera komin aftur til Lúx um 12-14. ágúst..

Síðan kemur nýja "peran" okkar þ. 22. ágúst! Kaja heitir hún og hlökkum við mikið til að kynnast henni. Held að það sé alveg ljóst að við höfum verið ljónheppin með "perur" og eigum örugglega eftir að fá báðar fyrrverandi (Marian og Salóme) í heimsókn áður en langt um líður!!

..If you are reading this Marian, I am suggesting that you come for a visit! We've been tracking your adventures throughout Australia and are looking forward to hearing more about them over the dinner table :O)

Það er því nóg að gera á næstunni. Höfum heldur ekki alveg legið í leti síðustu vikur. Um síðustu helgi var Blues og Jazz hátíð í Lúxemborg! Algjörlega frábært dæmi. Minnti mann á menningarnótt heima, bara einhvern vegin (sorrý) þúsund sinnum skemmtilegra...

Eyddum síðan gærdeginum í bænum þar sem miðaldarhátíð var í gangi.. .. tókum reyndar bara eftir því þegar við vorum á leiðinni heim frá sjóræningaskipinu sem er rétt við bæinn. Risa leiktæki fyrir krakka og busluaðstaða. Hér eru tvær myndir teknar úr símanum, við höfum ekki alveg verið að muna eftir myndavélinni uppá síðkastið!!

Biðjum annars að heilsa öllum,

uppgefin og co.

Maastricht.....skóóóór...

2008-07-13T20:45:00.005+02:00

Ok, Salóme, ef þú lest þetta, ekki verða reið.

En við vorum eiginlega að finna borgina. Þá meina ég BORGINA! Skruppum í gærmorgun til Maastricht í Hollandi. Liðlega 2 klst. ferð og boy oh.. boy! Þetta er alveg borgin. Allt iðandi af mannlífi, litlum sætum verslunargötum og skóm.

JÁ! Skóm!

Í Lúx fást eiginlega ekki skór. Maður telst vera mjög heppinn að finna flotta skó hér. Svoldið eins og að vinna í lottói. Enda vantar enn aldurshóp hér inn, þ.e. háskólafólk, sem auðvitað skapar eftirspurn eftir flottum skóm ;O).

Háskólanemarnir eru sumsé allir í Maastricth. Í flottum skóm!

Mmm.. ætlum að fara bráðlega aftur og gista þá kannski eina nótt. Allir velkomnir með! ..Maastricht er alveg málið, er m.a. með 4 Michelin stjörnu veitingastaði!

Það er ansi mikið, just so you know it!! Þetta er sumsé borgin sem ég ætla að skoða miiiklu betur!

Erum sumsé bara á rólegheitarnótum þessa dagana, með eitt barn og hið ljúfa líf ræður ríkjum. Söknum auðvitað Gabríelu óendanlega mikið en vitum að hún er í frábæru yfirlæti; var í stelpupartýi í gær hjá ömmu Lallý, er á sundnámskeið og leikjanámskeiði, er á leiðinni á Krosseyri næstu helgi og nýtur þess á milli ljúfa lífsins í faðmi ömmu og afa og allra hinna sem vilja knúsa hana :O)

Erum eiginlega bara að tjilla, ekkert að frétta þannig þannig að þetta er bara svona stutt til að segja hæ!

Eitt myndaband að lokum, tekið fyrir 10 mínútum, rétt fyrir háttatíma og tiltekt.

bless í bili,
slauga og co.

Ein í kotinu... eða svona næstum því!

2008-07-03T19:31:00.007+02:00

Saaaaa .... lóóóóóóó.... meeeeeee

Gaaaaa.....bíjjllllllllll......laaaaaaaa

Rebekka kallar!

Allir farnir, gestir, au-pair og barn. Þ.e. eitt barn, Gabríela.

Hitt barnið, sem gengur einnig undir nafninu rauðhærði skriðdrekinn, er ein með foreldrum sínum. Hún gengur um húsið og kallar þessi tvö nöfn til skiptis. Gaaabííííjjlaaaaa.... Saaaaalóóóómeeeeee. Og enginn svarar. Fúlt. Skilin ein eftir.

Foreldrarnir hugsa sér gott til glóðarinnar og sjá fyrir sér að nú hefjist uppeldið! Það hríslast örugglega um nokkra við þennan lestur, enda jafnast þetta á við dvöl í ungliðabúðum kaþólsku kirkjunnar á miðöldum.

En það er alveg á hreinu að Salóme er saknað (og auðvitað Gabríelu líka..). Smelli hérna inn mynd sem ég fékk að stela frá Saló. Tekin þegar hún var að passa fyrir okkur á meðan við vorum í Róm:

Algjörar dúllur.. allar þrjár! Takk Saló fyrir veturinn! Hugsaðu svo vel um hann frænda minn annars kem ég og tek í skottið á þér!!!

Annars er gestagangur búinn að vera með ágætis móti. Á 10 daga tímabili voru hér í húsinu auk fjölskyldumeðlima; Sigga og Eygló, (mamma Saló og litla frænka), Sissó, Begga og Kristinn og Jón og Gullý!

Auk þeirra, en ekki á sama tímabili, fengum við Dísu, Gretti, Andreu og Emil í heimsókn.

Erum því enn í sæluvímu eftir allar þessar heimsóknir. Fyrrnefndi hópurinn (fyrir utan Jón og Gullý) var það heppinn að hann náði afmæli hertogans hér í Lúx, en þá halda Lúxarar sína þjóðhátíð. Allur bærinn var undirlagður af tónlist og partýi og endalaust gaman. Veit að ég má reikna með B&K á sama tíma að ári :O)

Gabríela er komin til Íslands og dvelur í góðu yfirlæti hjá ömmu sinni og afa. Veit að hún hefur verið að "hjálpa" Ósk með fótboltanámskeið og er nú væntanlega stödd upp í sumó í sveitasælunni. ...skal alveg viðurkenna að ég er pínu abbó ;O)

Fótbolti er hins vegar ekki mjög ríkjandi í skólanum hennar Gaby. Enda geðsjúklega amerískur skóli.. yes, há dú jú dú!

Þessi myndir segja væntanlega meira en mörg orð!

Viljum svo endilega hvetja fólk til að nýta sér flugferðir til meginlandsins áður en að KREPPAN verður til þess að flugsamgöngur við Ísland leggjast af og gamli Gullfoss verður tekin aftur í notkun. Pæliði aðeins í því.. kreppa hvað!
Kveðjum héðan í bili úr Lúxuslandinu. Þurfum að huga að því hvað við gerum á morgun, frúin tók sér frí og vorum við að spá í að skella okkur til Brussel með lestinni. Vitum það ekki. En það gæti verið næs...

Þar til næst,
slauga og co.

Af hátíðardögum og öðrum dögum..

2008-06-14T14:00:00.023+02:00

17.júní í dag..

Ekki nóg með það að við hér í Lux erum 2 klukkutímum á undan í tíma og tilveru, heldur erum við einnig á undan í stórviðburðum og höldum upp á 17.júní í dag. Þ.e. 14.júní...

Ætlum að fara á hátíð Íslendingafélagsins í Lúx sem er einhversstaðar norður í landi í klukkutíma fjarlægð. Munum við þar belgja okkur út af SS pylsum og lambakjöti ásamt því að bergja á himneskum drykkjum ættuðum úr ölgerð Egils nokkurs Skallagrímssonar. Mmm.... malt og appelsín... Tökum auðvitað lagið og munum syngja og tralla "hey hó jibbíjei" í allan dag.

Ég lofa!

Smellti einni af stelpunum áðan, svona í þjóðhátíðarstemmingunni:

Annars er það auðvitað helst í fréttum að Kristján vinnur ekki lengur hjá Kúnna og Nagla og hefur því aftur hafið atvinnuleit hér í Lúxemborg. Veltir hann því nú fyrir sér hvað hann vill taka sér fyrir hendur á milli þess sem að hann kíkir á leikina í einhverri fótboltakeppni sem tröllríður öllu þessa dagana. Maður veltir því fyrir sér hvort um tilviljun sé að ræða ;O)

Rebekka er öll að koma til í tungumálinu. Tilkynnti móður sinni einn daginn þar sem hún stóð sveitt inn á baði að reyna að koma andlitinu á og hárinu í skorður að "mamma prinsessa líka..." Hversu sætt er það? Litli skriðdrekinn okkar á svona massífa smurolíu takta til og meira að segja tók kúrs í blómaskreytingu um daginn til að geta fært móður sinni gjöf á mæðradaginn hér Lúx:

...nokkur feit stig skoruð þarna :O)

Gabríela hefur hins vegar hafið meistaranám í niðurtalningu. Allt er talið niður. Það heitasta í niðurtalningu er núna hversu margir dagar eru þangað til hún fer til Íslands. Hún er með nokkrar útgáfur. Í dag eru það 13 "allir"-dagar eða 9 skóladagar. Mikill spenningur fyrir að koma heim og hitta alla! Hún er að sjálfsögðu búin að bóka ferð á Krosseyri og auðvitað í sumó hjá ömmu og afa. Hún ætlar í klippingu hjá Sollu frænku, sundnámskeið í afa og ömmu sundlaug og hitta Garp og Gútsí. Bið alla aðila vinsamlegast um að aðlaga sín plön að hennar ;O)

Jæja, ekki eftir neinu að bíða. Volvóinn er mættur fyrir utan og við stúlkurnar eigum að koma okkur út hið snarasta. Biðjum að heilsa öllum með ósk um gleðilega þjóðhátíð.. fjórtánda, fimmtánda, sextánda eða sautjánda júní.

Húrra!

ástarsaknaðarogalltþað..

slauga og co.

Diskó friskó...

2008-06-03T08:00:00.004+02:00

Daginn!

Fórum í diskó partý um helgina og ég bara varð að setja inn þessa mynd.

Aðallega út af skegginu hans Kristjáns.

Hvet ykkur til að stækka myndina og skoða mottuna....

Afmælisbarn dagsins!

2008-05-03T10:57:00.003+02:00

Dýrafræði..

2008-05-01T19:59:00.003+02:00

Veist þú hvað dýrin segja?

Óskar-listi?

2008-04-22T20:52:00.002+02:00

Auðvitið var það Ósk sem gat listann, svona 92%.. enda enginn smá óskalisti hér á ferð. Eina atriðið sem vafðist fyrir henni var nr. 10. Þetta er "einhverja bók" :O)

..og varðandi "litla trampólínið" þá er það ekki hógværð sem spilar þarna hlutverk, heldur örvænting. Það var nefnilega búið að tilkynna henni að það yrði ekki keypt trampólín, ekki nú og ekki í framtíðinni.. erum búin að heyra aðeins of margar hryllingssögur tengdar þessu. Þá uppgötvaði hún að það er til mini-útgáfa af þessu og er að reyna að troða henni inn í pakkann... snjöll stelpa!

Annars er það að frétta að ég skaust til Parísar um helgina með stelpum úr vinnunni, voða gaman og er stefnan sett á Róm um næstu helgi! Þar ætlum við að hitta Vigga og Grétu og eyða með þeim nokkrum dögum í þessari spennandi borg. Hlakka mikið til. Ábendingar um veitingastaði eru vel þegnar!

Munum síðan keyra niðreftir til Spánar 9.maí og vera í viku hjá tengdó. Eigum von á því að Heiddi, Signý og Gulli (ásamt nýjum ófæddum erfingja) verði á staðnum og hlakkar okkur mikið til að hitta þau :O)

Þetta er svona nokkurn veginn planið fyrir næsta mánuðinn. ´

Biðjum að heilsa öllum í bili,
kv
slauga og co.

Óskalisti Gabríelu...

2008-04-18T12:43:00.002+02:00

Finnst rétt að þið spreytið ykkur á þessu áður en ég set inn "þýðingu"!

Sumarið komið?

2008-04-06T20:02:00.005+02:00

Byrjum á ljósmynd...

..eins og sést þá tók sumarið örlitla U-beygju núna um helgina! Skiptust á skin, skúrir og massíft haglél!! Erum ekki sátt!

Hér keppist fólk við að sannfæra okkur um að í fyrra hafi verið 30 stiga hiti í apríl, yeah right! Kanntu annan...

Heimsóttum nágranna okkar í dag, Gígju og Jeromie, en þau búa á horninu fyrir neðan okkur. Hún er íslensk og hann Belgi. 2 fjörugir strákar á heimilinu, Leó, sem varð 7 ára í gær og Viktor sem er rétt 2 mánaða. Leó og Gabríela náðu vel saman, horfðu á sjóræningamynd og ætla sér stóra hluti í Playstation.

Greyið drengurinn, veit ekki á hverju hann á von, hún er auðvitað búin að taka "master class" og "extensive training" hjá frú Mogensen..

Fórum í gær á skemmtilega sýningu sem heitir ca... "Mekanískir draumar Leonard De Vinci"

Þar er sumé búið að byggja slatta af þeim hlutum sem hann teiknaði, eiginlega ótrúlega fríkað að sjá hvað hann var óendanlega langt á undan sinni samtíð. Hér er linkurinn fyrir þá sem treysta sér í frönskuna.

Fleira er ekki í fréttum... ætla að reyna að enda á vídeói, sjáum hvernig til tekst!

Bæjó,

slauga og co.

Moi buggaði í bíjinn..

2008-04-02T00:15:00.003+02:00

..bara örstutt (af því að síðustu færslur hafa einmitt verið svo langar og ítarlegar ;O) )..

Fannst þetta bara óhemju fyndin setning sem datt úr úr fransk/íslenska barninu okkar um daginn. .. sumsé:

"Moi buggaði í bíjinn" þýðir "ég gubbaði í bílinn".. en það var mér tilkynnt í gær þegar ég kom heim. Þá hafði Rebekka fengið nóg af ógeðlsegri bensínstækju í bílnum (gat á bensínleiðslu aukabílsins sem leiddi til megnrar stækju sem var lagað í dag) og gerði sér lítið fyrir og ældi til að mótmæla þessu.

Hún er sumsé öll að koma til í orðum. Þau eru bara óeðlilega undarlega samsett í augnablikinu vegna blöndunar tungumálanna!

Moi (ég) er notað óspart
Veux pas!! með áherslu (vil ekki)
Ici, ici, ici... (hér, hérna, hér ..oft með æsingi)
Encore (aftur)
Au revoir.. gjarnan sagt þegar hún er búin að fá nóg af liðinu!
NON!!!! ...mikið notað, held að þýðing sé óþörf!

Annars er Kristján farinn að vinna hjá flutningarfyrirtækinu Kúnni og Nagli (Kuehne-Nagel.com)
...hann kemur sjálfur með ítarlegan fréttaflutning af því djobbi á næstunni. Mér færist það illa úr hendi!

Annars biðjum við bara að heilsa í bili og líka broddgölturinn sem við hittum þegar við komum heim áðan... hrikalegt krútt og var bara að tjilla við tréð!

bæjó,
slauga og co.

Páskar og París..

2008-03-24T11:05:00.008+01:00

Nokkrar myndir:

Skruppum til Parísar á Skírdag og var ætlunin að eyða Föstudeginum langa í faðmi Dúmbó og félaga..

... hringekjurnar voru vinsælar..

Síðan komu páskarnir með tilheyrandi súkkulaðiáti... Báðar höfðu föndrað páskakörfur í skólunum og var innihaldið ekki skv. stöðlum manneldisráðs.. ekki einu sinni nálægt því!Á leiðinni heim frá París var Gabríela búin að vera að lesa fyrir Rebekku. Lestrarhraðinn er ekki orðinn mjög mikill ennþá og er greinilegt að Rebekka er alveg með það á hreinu með hvaða takti á að lesa bækur.. ég vona að þið getið opnað þetta vídeó.. þetta er fyrsta vídeótilraunin á bloggi..

Meira ekki í bili..

Gleðilega páska og allt það,

slauga og co.

Breytingar í stofu..

2008-03-15T19:17:00.003+01:00

Nýtt útlit..

2008-02-26T11:47:00.003+01:00

..og meiri breytingar á bloggi á leiðinni.

Þurfti smá hvíld frá bloggi, byrja að krafti... bráðum!

luv
slauga

Jólabréfið 2007.

2007-12-21T01:12:00.000+01:00

Kæru þið öll, til sjávar og sveita!

Í ár var ákveðið að bréfið yrði í þeim stíl sem hefur einkennt samskipti okkar við umheiminn síðustu mánuði.. þ.e. að það yrði birt á blogginu okkar.

Árið byrjaði með hefðbundnum hætti. Það blundaði þó í okkur fram eftir vori að þetta yrði ár breytinganna og viti menn, um leið og prófum lauk hjá frúnni í vor var haldið af stað á starfsmannadeild Landsbankans og þá var ekki aftur snúið. Útibússtjórastólnum var skipt út fyrir stöðu í lánadeild bankans í Lúxemborg og fjölskyldan pakkaði niður í tösku. Eða réttara sagt töskur og einn stóran gám.

Risastóran.

Reyndar var ákeðið að fá fagfólk í það þar sem Kristján áttaði sig snemma á því að það yrðu litlar líkur á því að það yrði haldið út ef frúin ætti að sjá um pökkunina. Hún er víst þekkt fyrir arfalélegan árangur á því sviði..

Kristján kvaddi Eimskip með tár á hvörmum, enda lágu fyrir breytingar á fyrirtækinu sem hann var meira en lítið til að taka þátt í. En húsmæðrastörfin biðu og karlinn tók völdin í húsinu. Að sjá um þrjá kvenmenn er heljarinnar verk. Sérstaklega ef þær eru morgunsvæfar, geðstirrðar og snúnar .. sem auðvitað engin af okkur er.. þannig að verkið var auðvitað “pís of keik”..

Gabríela stundar nú nám í International School of Luxembourg og Rebekka stundar eitthvað allt annað í leikskólanum Enfant de la Roi. Þær eru báðar sælar og glaðar með sitt og bæta við sig á hverjum degi í tungumálum og annari færni. Höfum trú á því að þær verði frekar sterkari karakterar fyrir vikið en ekki..

Frúin er síðan búin að vera í vinnunni. Áhugavert að átta sig á því hvað maður kann lítið. Þ.e. ég kann ýmislegt um aðra bankatengda hluti.. en þeir bara nýtast mér ekki þarna. Það er því nóg að læra og ekkert nema gott um það að segja.

Jólin færðust síðan nær og nær og þetta árið gerðust undur og stórmerki.

Kristján bakaði Sörur.

Já, það er engin lygi. Kannski ýkjur en engin lygi. Það eru meira að segja til myndir af honum að leggja lokahönd á meistaraverkin með hvítu “K”-i.... úr dýrindis hvítu - Odense súkkulaði!

Það er því með mikilli gleði sem frúin ákveður að afsala sér bakstri komandi jóla með þá fullvissu að þessu hljóti hann að rúlla upp. Ef maður byrjar á erfiðustu sortinni þá er hitt allt barnaleikur! Er það ekki?

Við hlökkum síðan til að takast á við nýtt ár á nýjum stað. Upplifa vorið og sumarið og vonandi verðum við þeirrar gæfu aðnjótandi að fá góða gesti í heimsókn. Það hefur allavega einhverjum verið hótað í þeim tilgangi að ná því fram..

Við óskum ykkur síðan öllum gleðilegra jóla og gleðilegs nýs árs. Þau ykkar sem eru á ferð um mið Evrópu eruð vinsamlegast beðin að stoppa við á 8, rue Raoul Follereau, L-1529, Luxembourg.. og þiggja kaffisopa.

Það verða kannski kökur með.

Jólakveðjur,
Kristján, Sigurlaug, Gabríela og Rebekka.

..það kom mús í heimsókn..

2007-12-14T13:19:00.001+01:00

..oh..the sweet revenge..

2007-12-11T14:09:00.000+01:00

Ég sé þetta alveg fyrir mér. Mamma og frú Clausen sitja saman á dimmu kaffihúsi í þeirri von að engin sjái til þeirra. Önnur réttir hinni brúðuna, hin heldur á nálinni. Brjálaðir kjúklingar og geggjaðir hanar dansa í kringum þær og Voodoo stemmingin er fullkomin. "Þetta kennir þeim".. segja þær og hlægja brjálæðislega... um leið og nálin fer í dúkkuna og seiðurinn er fullkomnaður.

Eða kannski ekki. Kannski er þetta bara smitandi. En í ljósi síðasta pistils, þegar ég var greinlega of snemma á mér að hrósa happi yfir því að vera ekki á staðnum þegar börnin mín fá ælu/niðurgangs pestina, má segja að skrattinn hafi hitt ömmu sína. Eða mína. Eða þeirra. Eða eitthvað...

Sumsé.. stutt yfirlit yfir helgina: veikindi (þessi ógeðslegu) og enginn kastali.

Stutt yfirlit yfir síðustu nótt. Allar veikir heimsins settar í tíundaveldi og margfaldaðar með sjö.

Auðvitað er þetta ekki ömmunum að kenna..(held ég..) það hljómar bara miklu dramatískara þannig.

Ljósi punkturinn við þetta er að þetta er mjög öflug megrun. Það fer allt út. Um alla neyðarútganga. ..og svo langar manni ekki að borða neitt. Aldrei.

En í ljósi sögunnar þá geri ég ráð fyrir því að þetta sé eins og þegar maður segist aldrei ætla að drekka aftur.. ;O)

En af örlítið léttari og skemmtilegri fréttum þá hefur Kristján formlega verið tekinn inn í morgunverðarsaumaklúbbinn og er boðinn í jólamorgunverðarklúbb á föstudaginn. Hann ætlar að baka eitthvað dásamlegt fyrir þær þannig að þið ykkar sem laumið á "idiot-proved" uppskriftum látið í ykkur heyra..

Hann er allavega mjög spenntur og gengur hér um húsið muldrandi "sörur... þær vilja sörur..".. Held að það sé ljóst að maðurinn þarf að fara að komast í vinnu.

Vorum síðan að frétta að elsklingurinn hann Sissó er á leiðinni til okkar... með örlitlu vinnustoppi í Frankfurt. Hlökkum mikið til að hitta hann í næstu viku!

Erum annars að græja óperuherbergið, Kristján var sendur í IKEA til að redda því sem átti eftir að redda, en síðan fara þau bara saman, hann og Salóme og kaupa rest....

Veðrið sýnist mér eitthvað vera að skána, en hér hefur rignt eins og hellt væri úr fötu síðustu vikur. Einhverjir eru farnir að smíða örk. En nú er allavega blár og huggulegur himinn, en hvort það er bara í suðurátt veit ég ekki því ég hef ekki litið út norðan megin :O)

Hlökkum annars mikið til að hitta þau ykkar sem hafið tíma til að kíkja á okkur 20.-21. des. .. Þannig að þetta sé alveg á hreinu þá komum við landsins 20.des kl. ca. 15.30. Þá verður brunað með frúnna í björgunaraðgerð á hári og eftir það verðum við öll í Jörfalindinni. Förum síðan í flug kl. 17 næsta dag, en þurfum að mæta mjög snemma þar sem það er ekki hægt að bóka sæti... íhaa.. frábær þjónusta hjá Flugleiðum!!! Worst case scenario er því að við verðum á víð og dreif um vélina. Frábært fyrir þann sem lendir með Rebekku :O) :O)

Nóg í bili, vona að þetta hafi ekki verið of þunglyndislegt blogg. ...þau verða að fá að vera með líka!

Bæjó spæjó,
slauga og co.

Myndir og mál..

2007-12-03T19:31:00.001+01:00

..áður en pistillinn hefst er rétt að þakka dætrum okkar Kristjáns fyrir að hlýða okkur.

Takk.

Það er nefnilega þannig að af öllum pestum sem börn geta fengið finnst mér ógeðslegast að "díla við" ælupest og niðurgang. Bara ógeð. Þannig að við höfum brýnt það fyrir þeim að bíða með allt slíkt þar til að þær eru í pössun hjá skyldum aðilum. Helst ömmum og öfum. ...og það klikkaði ekki þessa helgi frekar en fyrr í vetur! Frú Clausen fékk allan pakkann!! Kl. 5 að nóttu. En við ekki. Út á þetta gengur gott uppeldi. Við biðjum, þær hlýða...

En þá er rétt að birta nokkrar myndir af þessum hlýðnu börnum. Fannst þessi reyndar vera frekar fyndin og lýsa stemmingunni sem Rebekka hefur yfir sér. Pínu púki en samt eitthvað svo kjútt.. ;O)

Við höfum reyndar komist að því að Rebekka er frönsk. Ekki íslensk, og það er það sem að hefur verið að valda misskilningi á heimilinu. Hún hefur í raun og veru ekki skilið okkur og við ekki hana. Það leið ekki vika þar til hún var farin að segja Au revoir við fóstrurnar, og rak okkur þá minni í þegar hún segði þetta og við héldum að hún væri að segja "afi". Algjör misskilningur, hún var í raun og veru að tala frönsku þar sem hún var loksins komin í landið sem skildi hana. Fyrir þá sem efa þetta þá er rétt að benda á að hún hefur ekki enn sagt "bless" eða "bæ bæ". Bara au-revoir. Erum að vonast til að fóstrurnar skili til okkar fréttum sem henni hefur legið á að segja okkur.

Finnst nú rétt að setja samt eina "englamynd" af henni, fyrir ömmurnar, svo þær geti fyrirgefið henni veikindin sem hún tímasetur við viðveru þeirra..

Af hinni dótturinni er einnig allt gott að frétta. Hún heldur áfram að bæta við sig enskum /amerískum frösum and is verrý möts lörning ábát kristmas.. jú nóv, djísus and stöff..

Er annars alveg að blómstra og höfum við mikla trú á því að næsta ár verði hún í aðalhlutverki í skóla-jólaleikritinum. Í ár er hún bakgrunnur ;O). Hún er annars ótrúlega samviskusamur nemandi. Verður alltaf að klára heimalærdóminn um leið og hún kemur heim. Sem hefur orðið til þess að við veltum því fyrir okkur hvort að hún sé ættleidd. Þetta er allavega hæfileiki sem hvorugt okkar kannast við að hafa komið með í genapottinn ! En gott mál engu að síður (þ.e. lærdómsstemming ekki ættleiðingin..)!

Erum síðan að fara að fá Au-pair til okkar í janúar. Hún heitir Salóme og er frá Bolungarvík. Þetta er eingöngu gert fyrir Dúnnu frænku enda er það ljóst að það er afbragðsfólk sem kemur að vestan. Vill meira að segja svo til að kærastinn hennar er sonur elluboggudúddu.. æ nei, ég man ekki svona ættfræði, en svona hljómar þetta allt á vestfirsku. Gunni-stínu-beina..Spurning um að mamma setji inn komment hverra manna drengurinn er :O)

Barcelona ferðin var síðan alveg afskaplega vel heppnuð. Í alla staði. Á fundinum á laugardagsmorgun leit ég reyndar út eins og dauðinn sjálfur hefði ælt yfir mig. Held að það hafi eingöngu verið vegna þess að ég fékk ekki nógan svefn. Örugglega bara það. Ákvað að það færi bara best á því að ég tæki á mig útlitslega mynd á líðan allra annarra í herberginu..

En jæja.. nóg í bili. Set samt inn mynd af kransinum mínum fína sem ég gerði um daginn. Bara til að monta mig. Finnst hann voða fínn :O)

Gabríelu langaði síðan að koma því á framfæri, rétt í þessu, að hún saknar ykkar allra mjög mikið.. :O)

Ástarkveðjur,

Luxararnir

Hvað er nýtt..?

2007-11-27T19:29:00.000+01:00

Aðalfréttin er auðvitað sú að ...

...pössuninni um næstu helgi hefur verið reddað. Það er engin önnur en frú Lára Clausen sem mætir til leiks! Það kom í ljós að það var undarlega ódýrt að fljúga á milli Alicante og nálægra flugvalla við Luxemborg (reyndar ekki til Lux). Reyndar var það svo ótrúlegur prís að það er spurning hvort að flugbúnaður á vélinni sé í líkingu við hjólabúnað Flintstones bílanna… hmmm?

Eftir að hafa fattað þetta munum við einskis svífast við að flytja inn maddömmuna þegar þurfa þykir! Hún mun því mjög líklega fara í felur á næstu mánuðum….! Það verður allavega mjög gaman að sjá frúnna og er Gabríela að fara á límingunum og getur varla beðið eftir að fá ömmu í heimsókn. Skilur samt ekkert í því að afi komi ekki líka, vill helst að við látum sækja hann með þyrlu út á sjó!

Ferðinni er annars heitið til Barcelona þar sem vinnutilgangi verður blandað við almennan skemmtanatilgang. Verður án efa mjög skemmtilegt og gaman að fá tækifæri til að kynnast starfsfélögunum og mökum þeirra betur! Þetta verður vonandi líka góð afslöppun með lítilli verslun þar sem að frúin tæmdi verslanirnar í Kaupmannahöfn um daginn… Skilst reyndar á Kristjáni að hann ætli í Spa með stelpunum á laugardagsmorgun... það verður áhugavert..

Síðan er á döfinni Gala-jólakvöld í frönskum kastala þann 8.desember. Er búin að biðla til óska-Spánverjans um að koma í helgarferð til Lux, en hún þykist hafa öðrum hnöppum að hneppa ;O) Skil það reyndar vel, erfitt að fá helgarfrí þegar lítið kríli er komið í heiminn þar! En boðið stendur ennþá fröken !!

Á föstudagskvöldið síðasta var reyndar kvennakvöld bankanna sem í þetta skipti var haldið hjá Glitni. Ofboðslega flott hjá þeim og skemmtilegt. Leynigestur kvöldsins var síðan Jónsi úr Svörtum fötum, sem söng og trallaði það sem eftir lifði kvölds…!

Gabríela fór í afmælisboð á laugardaginn á meðan við fórum til Belgíu og keyptum eitt stykki þvottavél. Það hefur nefnilega komið á daginn að þvottavélin okkar heldur að hún sé uppá punt. Hún svosem tekur við þvottinum, veltir honum til og frá ... en virðist samt ekki vera fær um að ná einum einasta bletti úr ... Mamma hjálpaði síðan til við að brjóta vélina niður andlega með að segja marga ljóta hluti í nærveru hennar. Eftir það hefur vélin bara ekki jafnað sig.

Ákváðum því að skipta yfir í Siemens með hrækiprógrammi eins og mamma á... (fyrir þá sem ekki vita hvað hrækiprógramm er, skal það upplýst að það er 15 mínútna ofurprógram à la Siemens, hafði ekki mikla trú á því í fyrstu en er nú einlægur aðdáandi þess eftir að hafa búið í sama húsi og umrædd vél í nokkrar vikur..). Fáum vélina á morgun (hér gerist EKKERT samdægurs) og taka þeir gamla hróið með.

Þeir eru ægilega duglegir Lúxembúrgarnir í svona umhverfisvitundarverndardæmi... bjóðast alltaf til að sækja gamla eintakið þegar verið er að skipta út.. Spurning hvort að það sé sambærilegt í boði við skilnaði? “Við sækjum bara kallinn um leið og við komum með nýja eintakið.. ;O) “

Erum síðan búin að fá bílinn okkar! Loksins!!!! Þeim tókst auðvitað að klúðra smá með því að setja VITLAUSAN lit á bílinn!! En mig hefur svosem alltaf langað í bleikan bíl. Á eyrnalokka í stíl. Hann er allavega æðislegur að innan...

Erum síðan farin að telja niður til Ameríkuferðarinnar!! Óbojj hvað verður gaman! Fyrir þá sem ekki vita ætlum við familían að fara til Bandaríkjana margumtöluðu og eyða þar jólunum með Sveinka, Kollu, Jóu, Gunna, Leibba, Steina og Gunnari Finni. Verðum í kuldanum í Stowe, Vermont og verðum “aðeins” búin að safna um 300þúsund krónum í sameiginlegan matarsjóð þegar við förum. Alveg spurning hvort að það dugi fyrir ca 10 daga!!!!!!!!!!!

Er síðan á leið í jólaföndurdæmi með "Lísunum" en það er hópur íslenskra kvenna sem tengjast Landsbankanum með einum eða öðrum hætti. Ætla mér að búa til einn aðventukrans.. vona að það heppnist þrátt fyrir að ég sé ekki með mömmu mér við hlið ;O)

Vona að allir hafi það gott... við erum allavega ekki illa haldin! (það verður yfirvigt um jólin.. bara ekki í töskunum!!!!!!!!)

Ástarkveðjur,
slauga og co.

p.s. bílinn er auðvitað ekki bleikur, hann er silfurgrár, átti að vera brúngrár... ;O)

Er þetta íslenskt mangó...?

2007-11-19T18:06:00.000+01:00

Þá er komið fréttabréfi vikunnar.. dróst reyndar aðeins vegna ferð frúarinnar til Köben, en meira af því síðar.

Byrjum á yngsta meðlim fjölskyldunnar.

Rauðhærði skriðdrekinn hefur hafið innrás sína inn í frönskumælandi leikskóla! Hún virðist vera að pluma sig vel, ...með smá gráti á morgnanna, ennþá! Tók reyndar trylling á pabba sinn um daginn þegar hann fór út af vananum og sleppti morgunkaffinu með hinum mömmunum. Hún hélt nú ekki, benti í áttina að kaffistofunni og grét sáran! Þarf greinilega sitt kaffi á morgnanna :O)

Er þetta íslenskt mangó? spurði Gabríela um daginn þegar hún og Sylvía sátu í makindum og borðuðu niðurskorna ávexti. Nei, ekki var það svo, en mangóið hafði reyndar "gleymst" í ávaxtaskálinni og var því orðið frekar ofþroskað.. og kannski ekki alveg eins og hún átti að venjast. Niðurstaðan var því sú, að fyrst að ávöxturinn var eitthvað "funky" þá hlyti hann að vera íslenskur... áhugavert!

Síðan er það Kaupmannarhafnarferðin. Fór til að hitta Vesturbæjarútibúið í jólahlaðborði í Kóngsins Köben. Mikið var ææææææðislegt að hitta þau öll... svo ég tali nú ekki um herbergisfélagann, frú Kvaran :O) Fengum reyndar fyndnasta hótelherbergi sem ég hef komið í. Hef aldrei, og þá meina ég aldrei, séð jafn lítið herbergi. Og meira að segja undir súð þannig að innilokunarkenndin (ef við hefðum haft svoleiðis) hefði orðið fullkomin. En það skipti engu, kompaníið var það sem skipti máli og það var fyrsta flokks!

Þetta var þó ekki þrautalaust að komast á leiðarenda þar sem að SAS, sem er annálað fyrir ömurlega þjónustu og tíð "cancelled flights", ákvað að ég væri ekki velkomin í vélina og seldu sæti mitt (sem ég hafði keypt fyrir 1 og 1/2 mánuði) til einhvers annars. Ég var sú eina sem komst ekki í vélina! Þeir sendu mig í staðinn í sight-seeing um Evrópu og stoppi í Frankfurt. Smart. Fékk skaðabætur "à la SAS" sem er háð því að ég noti upphæðina hjá þeim.. annars fái ég bara 50%. Algjörir snillingar! Komst þó rétta leið heim, án aukastoppa..

Húsfaðirinn er farinn á stúfana að leita að vinnu og verður allt sett á fullt á næstu vikum. Þannig að þið ykkar sem hafið sambönd í Lúxuslandinu, látið vita af ykkur. Kallinn næst í síma +352 621 316 990 :O) Hans verður án efa sárt saknað úr morgunverðarhópnum enda þekktur fyrir hressleika á morgnanna! Sorry girls..

Eigum síðan að fá bílinn á morgun ..sjö-níu-þrettán... þeir eru búnir að draga það ansi lengi og verður fróðlegt að sjá hvort að þeir nái að standa við stóru orðin.

Annars er bíllinn okkar á Íslandi enn óseldur. Því er nú verr og miður. Auglýsi hann hér því enn og aftur til sölu.... Lýsing á gripnum er í bundnu máli annarsstaðar á síðunni..

Meira er nú ekki að frétta af mannskapnum í bili. Nema að okkur vantar helgarpössun 30.nóv-2.des..... Áhugasamir gefi sig fram við söluborð Icelandair og panti sér helgarferð til Frankfurt. Við skulum sækja ykkur. :O)

Ástarogsaknaðarogalltþað..

slauga og co.

Hef hafið störf á Snyrtistofunni Dýrðin..

2007-11-10T17:45:00.000+01:00

...spurning hvort að snyrtistofan ætti frekar að heita Dýrið..svona miðað við afrakstur og blót..?

Það er nú bara þannig að þegar maður er fluttur af landinu ylhýra þar sem maður var búin að koma sér upp allskyns þægilegum þjónustulinkum til að viðhalda (ó)endanlegri fegurð húsfreyjunnar þá fer að draga fyrir sólu þegar þessa aðila vantar hér. Ekki svo að skilja að Lúxembúrgískar konur séu kafloðnar og kiðfættar með náttúrulegan háralit, heldur er ég ekki alveg að leggja í það strax að biðja um "hár eins og Sigrún á Hársögu gerir" eða græja allt hitt stöffið eins og Halldóra á Snyrtistofu Ágústu gerir.. á frönsku! No merci monsieur..

Þannig að snyrtistofan opnaði í morgun. Byrjaði með vaxi..a'la öskur, blót og bölv.. og endaði með með hárlit í lengstu rót sem mannkyn hefur séð. Böttlerinn hló að mér allan tíman, en hann fær það borgað bölvaður. Engin desemberuppbót þetta árið! Afraksturinn er auðvitað stórkostlegur enda er efniviðurinn með eindæmum gæðalegur.

Bað síðan böttlerinn um að kveikja upp í arninum og brást hann vel við því, enda nýbúinn að fara út í skóg að höggva við (..eða kannski fór hann bara í búðina og keypti tilhogginn við..). Sjá má uppkveikjutaktana á meðfylgjandi mynd..!

Svona er hann aldeilis orðinn vel þjálfaður! Get leigt hann út til þeirra sem þess óska. Engin ábyrgð fylgir.

Nú er hann reyndar kominn inn í eldhús og farinn að gera að nautinu sem hann felldi í hádeginu... mmm.. nautasteik í kvöld með rauðvíninu sem ég heyri að hann er að opna! Skilst að um sé að ræða sömu tegund og Gunni bróðir skúraði gólfið með í Leifstöð.. fer betur í munni en á gólfi kallinn minn.. mundu það!

Í heimsókn hjá okkur er hún Sylvía sem ætlar að fá að gista í nótt. Þær tvær eru eins og samlokur þar sem að óstýrlátur ostur (Rebekka) er alltaf að reyna að troða sér á milli.

Hún gefur ekki þumlung eftir í baráttu sinni við að komast í klíkuna og er að ég held, að íhuga lengingaraðgerð í Rússlandi og talþjálfun til að komast nær takmarki sínu. Hér fyrir neðan má sjá vinkonurnar eftir andlistmálun dagsins. Gaby málaði Sylvíu og dittó..

Læt síðan fylgja með eina mynd af Rebekku síðan Gunni og Jóa voru hér.

Þá tók hún stroll "à la Afi".. dæmi hver fyrir sig ;)

Biðjum auðvitað að heilsa öllum og mikið væri nú gaman ef einhverjir af þeim sem kíkja við á síðunni, kasti á okkur kveðju.. þá erum við ekki alveg jafn langt í burtu!

Að lokum.. til hamingju með fallega nafnið þitt Kristinn Þór Hilmarsson. Knúsa þig í klessu þegar ég sé þig um jólin!

Au revoir..

Le böttler and the girls..

Vín og villtar meyjar..

2007-11-04T17:56:00.000+01:00

...ekki kannski í því samhengi maður tengir oftast, heldur hefur þetta svona meira verið þemað síðustu daga. Gunni og Jóa komu í heimsókn á föstudagskvöldið og tóku villtu meyjarnar hér á heimilinu gleði sína á ný eftir að hafa þurft að hanga með pabba sínum allllllllla vikuna! Loksins ný andlit!

Til að hafa ofan af fyrir settinu fórum við með þau í outlettin rétt hjá Metz (í Frakklandi fyrir þau ykkar sem eru ekki svona alþjóðleg..) og þar var aðeins náð að versla. Fórum síðan beina leið þaðan í vínkynningu til hans Jesúsar. Jesú þessi er af spænskum ættum og tekur á móti litlum hópum og leiðir þá í allan sannleika um spænsku vínin. Enduðum á því að kaupa örfá eintök (teljum núna bara í dúsínum) og verður jafnframt hluti af flugvélinni á þriðjudaginn nýttur undir áfyllingu á Baugakórsbarinn... Amen.

Í dag fórum við síðan í bröns niðrí Grund (ekki tengt elliheimilinu) og röltum svo um gamla miðbæinn. Allt lokað á sunnudögum hér þannig að það var ekki mikið úr verslun í dag. Hef það eftir áreiðanlegum heimildum að það verði tekið á því á morgun í Trier...

Förum á eftir á veitingastað með tryllingana tvo.. ekki þó þennan sem er á horninu á götunni fyrir ofan... ónei, því að hann sérhæfir sig í hestasteikum sem einhvernveginn ég hef ekki lyst á! Klárinn góði með bernaise sósu..? Held ekki! Neibb, förum með liðið á ægilega góðan ítalskan stað sem tekur vel á móti börnum og brjálæðingum. Fullkominn staður fyrir okkur!

Lífið dettur síðan í réttan gír á morgun þegar Gabríela byrjar aftur í skólanum eftir vetrarfrí. Rebekka byrjar síðan að öllum líkindum í aðlögun á leikskóla sem er rétt hjá skólanum hennar Gabríelu í vikunni. Þá er meiri tími fyrir Kristján að sinna heimilisstörfum að kappi. Geri ráð fyrir því að það verði allt "spick-and-span" hérna á næstunni! Annars var hann með stórleik um daginn þegar hann var að velta fyrir sér þrifmálum og sá fyrir sér öskubuskustörfin með hryllingsglampa í augum.... Hann vatt sér þá yfir til nágrannakonu okkar og fékk nafnið á hreingerningarkonunni hennar... !!! Held að ég þurfi að setjast niður með honum og fara betur yfir starfslýsingu hans sem heimavinnandi húsmóðurs!

Jæja, meira ekki í bili.

Biðjum að heilsa öllum....

Vikufrí..

2007-10-27T23:25:00.000+02:00

..hjá Gabríelu hófst í gær. Fyrsta af nokkrum sem dynur yfir skólabörn á þessu svæði yfir veturinn. Held að næsta (fyrir utan jólafríið) sé í febrúar, síðan eitt í mars og svo það síðasta fyrir sumarfrí í maí... Eins gott að einhver sé heima til að sinna börnunum.. ;O) (lesist: Kristján has settled down for good..)

Annar er það að frétta af heimilismálum að leikskólamál virðast vera að leysast, erum komin með tvo í sigtið sem eru lausir fljótlega. Annar er nálægt skólanum hennar Gabríelu en hinn er tiltölulega nálægt heimilinu. Sá heitir því skemmtilega nafni Jardin de la Musique, (Tónlistargarðurinn) og er mikil áhersla lögð á tónlistarsköpun og tjútt og trall fyrir tveggja ára og eldri :O) Gæti hentað skvísunni vel! Hún er allavega mjög áhugaverð í kjörbúðunum þegar hún beygir sig í hnjánum og byrjar að "bömpa" í takt við tónlistina... minnir dáldið á danshreyfingar Sveinbjörns frænda..

Á morgun breytist tíminn hér í Lúx, þannig að nú verður klukkutíma munur á milli okkar og rigningarogrokslandsins. Það versta er að stelpurnar vakna örugglega á sama tíma á morgun, þ.e. kl. 8, sem er þá í rauninni 7.. gæti reyndar verið að þær myndu vakna kl 7.. sem er þá aftur kl. 6.. og svo gætu þær vaknað hálfátta ....... !!

Þurfum bara að sannfæra þær um að það sé nótt nótt nótt !

Og já!! Til hamingju með nafnið litli Erlu og Ólason.. Ólafur Diðrik Ólafsson! Held að þú hljótir að verða Ráðherra eða eitthvað ægilega merkilegt með þetta virðulega nafn! Fylgist spennt með!

Fáum síðan góða gesti í næstu viku þegar Gunni og Jóa koma í heimsókn. Eins gott segi ég nú bara þar sem það er hringt í "Unna" mörgum sinnum á dag úr leikfangasímanum og varla er borðaður sá biti að hann sé ekki fyrir sama aðila. Á því von á að fá manninn sílspikaðan út með eldrautt eyra eftir mikla símanotkun..

Nóg í bili, skjáumst síðar,

slauga

p.s. salan á bílnum klikkaði, það er því enn tækifæri fyrir þá sem nöguðu sig í handarbakið eftir síðasta blogg....

Fyrstur kemur, fyrstur fær!!!!!!

2007-10-22T16:47:00.000+02:00

Ljótur bíll til sölu

kostar eina tölu

Talan sú er ekki há..

semja um það gjarnan má...

Afmælissöngurinn...

2007-10-20T19:01:00.000+02:00

Ætlaði að reyna að setja hér inn myndband frá afmælissöngnum í dag.. en eftir 2,5 klst. biðtíma í tölvunni virðist þetta ekki hafast! Sorrý!

Þökkum kærlega þeim sem hringdu... og takk fyrir pakkann, Kolla og Sveinki, nú verður dúkkan böðuð reglulega ásamt því sem leikið verður á munnhörpuna... mmmm....takk kææææææææærlega. ("týndi" batterínunum úr píanódæminu hennar Rebekku um daginn, fínt að vera komin með eitt svona sem gengur fyrir lungnamætti..) ! :O)

Afmælisdagurinn fór vel fram, fengum Sylvíu, Theu og Henríettu í heimsókn ásamt Marie og Rachel úr næsta húsi. Einnig kíktu Krissi og Rúna við ásamt vinum sínum sem eru í heimsókn og Oddbjörgu mömmu Rúnu. (Fyrir Landsbankafólk er það að segja um þá ágætu konu að þetta er hin eina sanna Oddbjörg í Bæjarhrauninu :O) )

Ákvað síðan að senda Kristján, mömmu og pabba í hvítvínssmökkun til "dílersins" þeirra Krissa og Rúnu. Keyptar voru 18 flöskur af indælis víni... sjáum hvað það dugar !!

Ætlum síðan að kíkja á morgun í kastala í Bouillon í Belgíu (http://www.bouillon-initiative.be/ ) þar sem fram fer mikil fuglasýning og var m.a. lýst með þessum orðum: "Fram til 11 nóv er fuglasýning í hallargarðinum þar sem fuglatemjarar láta uglur, hauka, hrægamma og kondór fljúga um og leika listir."

Þetta hentar örugglega fólki með fuglafóbíu mjög vel... eh... læt vita ef ég fæ taugaáfall!!! Ef að fuglarnir duga ekki til að setja mig út af laginu þá kíki ég á pyntingarklefann sem er í kastalanum...

Förum að skila settinu til Íslands. Fyrir áhugasama koma þau á þriðjudagskvöldið. Vinsamlegast farið varlega að þeim, þau verða MJÖG MJÖG þreytt.

Biðjum að heilsa öllum heima!!

Ástarogsaknaðarkveðjur með afmælislagi dagsins..

Afmælisbarn dagsins..

2007-10-20T11:55:00.000+02:00

kaffi og kökur kl. 3.

Allir velkomnir :O)

Sigurlaugur Hilmarsson kominn í heiminn!!

2007-10-17T08:20:00.001+02:00

...til hamingju elsku Hilmar og Eva!!!

Hann er algjört æði æði æði..

Knús og margfaldir kossar frá langaliðinu (sem lengdist töluvert og gránaði skyndilega í gær, er ekki frá því að mjöðmin á þeirri löngu hafi gefið sig og önnur ellieinkenni hafi gert vart við sig..)

... og okkur unglömbunum hér í Lúxembourg!

Mælum með vorheimsókn í vorsólina hér í Lúx með þann stutta!!!

Ástarkveðjur,
slauga og co.

Til hamingju með afmælið...

2007-10-15T08:23:00.001+02:00

...stóri bróðir...

Knús og kossar frá öllum í Lux

:O)

Myndir

2007-10-13T22:15:00.000+02:00

Jæja, byrjum á því að sýna ykkur nokkrar myndir í tilefni af því að síminn er loksins tengdur! Þ.e. íslenska gamla góða númerið okkar. Nú getið þið hringt í okkur eins og venjulega, án þess að setja nein númer fyrir framan. Bara sjö stafi, that's all folks!!

Byrjum á vinnudýrunum. Þið hélduð að þau væru hlekkjuð í kjallaranum. Öðru nær!! Mynd segir meira en þúsund orð..

Einmitt og akkúrat!!

Síðan er hér ein yndisleg af Gabríelu, tekin eftir fjölskyldudag Landsbankans..

...og síðan frá Trier..

..og ekki má gleyma skriðdrekanum!!

..og að lokum. Fór í foreldraviðtal um daginn. Allt gott um það að segja! En þar beið mín eftirfarandi mynd. Langaði að leyfa ykkur að njóta hennar einnig.

Bestu kveðjur frá lúx..

Sviptingar í Bourgarstjórn..

2007-10-11T20:39:00.001+02:00

Nýr meirihluti við það að taka völdin í Bourginni hér, þ.e. Lúxembourg.

Kristján væntanlegur á morgun og ef ég þekki dætur mínar rétt leynist í þeim lítill hrafnarbjörn sem skiptir liði þegar vel viðrar til. Dagar elsku mömmu eru liðnir ;O)

Það er búið að telja niður í komu kallsins og strika vandlega yfir á dagatalinu. Dagurinn á morgun verður án efa lengi fyrir þá eldri að líða, þar sem að hún er líka í fríi frá skólanum. Á morgun er ég sumsé að fara í fyrsta foreldraviðtalið! Það verður áhugavert.. svo ekki sé nú meira sagt!

Hef þetta stutt núna, er að passa fyrir Helene.. Skúli skrapp nefnilega á Frón!

Myndir hljóta að fara að koma.... eða hvað haldið þið?

Bestu kveðjur frá
LúxembouRRRRRRRRRRg

slauga

Tengingu náð..

2007-10-08T21:27:00.000+02:00

..og komin í samband! Fyrir þau ykkar sem vilja það vita erum við komin með Lúxembúrgískan heimasíma, númerið er 266 83449 (og muna eftir 352 á undan) en ég mæli með að fólk hinkri aðeins þar til að Kristján kemur og tengir íslenska númerið okkar við módemið. Þá er bara hægt að hringja eins og venjulega!

Í fréttum er annars það helst að vinnudýrin standa sig með stakri prýði. Þau taka upp úr kössum, skipta á bleyjum, þrífa ælur eftir börnin, skúra, keyra í skóla og vinnu, elda, lesa fyrir svefninn og rotast síðan. Lykilatriði er bara að tengja ekki sjónvarp fyrir þau strax. Halda þeim alveg á tánum... ekki fyrr en síðasti kassinn er í augsýn, þá má tengja imbann. Annars missir maður algjörlega stjórnina.

"Má ég horfa á "meeerí popinss"? segir sú eldri núna (eftir að tengingu á sjónvarpið var náð) og er farin að þróa með sé ævintýralega amerískan hreim. vonn tú þrí... mæ neim is Geibríela... Hún er annars ótrúlega aðlögunarfær og enn ekki kominn sá dagur þegar hún neitar að fara í skólann! Sjö níu þrettán..

Sú yngri tók Lúxemborg með látum. Henni halda engin bönd og ég er ekki frá því að villidýr í nærliggjandi skógum hafi ákveðið að halda sig til hlés. "ÁAI" er öskrað hérna reglulega og afinn tekur kipp. Það er sumsé verið að kalla á hann. Lúxemborgararnir halda hins vegar að hún sé að öskra "Au revoir" og brosa blíðlega að þessu hæfileikaríka barni sem er strax farið að tala frönsku. Little do they know, hún talar ekki einu sinni íslensku...

Vinnan er fín og jafnvel ívið meira en það. Ægileg gleði hér um helgina þegar hópur útibússtjóra Landsbankans mætti til að kveðja mig sérstaklega. Reyndar nýttu þeir tækifærið líka við að halda sinn árlega stóra fund, en auðvitað var lítið mál að bæta því við. Einstaklega skemmtilegt að hitta þá og tjútta með þeim svona í lok útibússtjóraferilsins :O)

Vona að allir séu hressir og glaðir heima og fyrir þá sem hafa áhuga eru til sölu tvær glæsikerrur heima, fást á ótrúlega góðum prís. Önnur er gömul og hin eldri. Hafið samband við kallinn ef þið viljið..

Bið að heilsa mönnum og músum,

slauga og co.

p.s. myndir koma síðar..

Í fréttum er þetta helst..

2007-09-27T20:32:00.000+02:00

..að forráðamenn Blogger.com höfðu samband við mig út af sérlegu álagi á kommentakerfið á síðunni minni. Ég er því beðin um að koma því á framfæri við fólk um stilla kveðjum og athugasemdum í hóf, kerfið þolir ekki nema ákveðið magn. Verið alveg róleg, ekki missa ykkur, það komast allir að!!!!

..annars er ein vika búin í nýrri vinnu. Er svona hægt og rólega að koma mér inn í hlutina, er þó enn stoltur handhafi titilsins "vitleysingur vikunnar" en vona bara að einhver nýr fari að byrja sem getur tekið við honum af mér..

..foreldrarnir, les parents (jú jú, maður er orðin svo alþjóðlegur að maður getur ekki bundið sig eingöngu í það ylhýra..) koma á morgun ásamt rauðhærða skriðdrekanum. Skilst á síðustu fréttum að heiman að hún stjórni afa sínum með harðri hendi, hafi jafnvel tekist að koma böndum á fréttaáhorf hans og stillingu hljóðs í sjónvarpi, eitthvað sem mörgum hefur dreymt um en fáa þorað..

..að leitin að leikskólanum stendur enn yfir! Sérlegur fulltrúi frá leikskólaráði mun þó mæta á svæðið 2.nóvember til að taka út dæmið. Ljóst er að það eins gott að byrgja sig upp á uppskeruhátíðum víðsvegar í nágrenninu til að undirbúa komu hennar og kallsins..

..veður er orðið skítt, svona rigning og frekar kalt. Treysti þó á að sólin láti sjá sig fljótlega aftur til að hita svæðið, þetta gengur náttúrulega ekki að hafa þetta svona! Fannst það stórkostlega glatað í morgun... alveg þar til ég las veðurfréttirnar frá Íslandi..

..fleira ekki í bili, er að passa 4 börn í augnablikinu þar sem skötuhjúin á heimilinu eiga brúðkaupsafmæli í dag! Börnin sofnuð og ég réðst til atlögu við tölvuna. Er að "mappa" leiðirnar fyrir mömmu og pabba þannig að þau rati hér um borg.. he he..."turn right.. allright..?"

Bonsoir...

Að byrja í nýrri vinnu, 101 for dummies....

2007-09-21T18:05:00.000+02:00

1. Finndu út hvar klósettið er, mjög nauðsynlegt að vita frá fyrstu stundu, kemur í veg fyrir óþægilegri augnablik síðar meir..

2. Finndu út hvar mötuneytið og kaffivélin er, álíka mikilvægt og nr. 1.

3. Ef þú ert ekki búinn að fatta nr. 1, slepptu þá nr. 2.

4. Sestu á réttan stað. Ekki t.d. í sætið hjá náunganum við hliðina á þér. Kemur einnig í veg fyrir vandræðileg augnablik.

5. Finndu út hvar pennarnir eru geymdir og blöð, þú virkar meira "að vinna" ef þú heldur fast um þessa hluti.

6. Msn og tölvupóstur eru nauðsynleg atriði fyrstu daga, þá lítur út fyrir að þú sért að vinna þegar puttarnir lemja lyklaborðið með miklum hraða.

7. Fake it 'till you make it.

Höfuðstaður Norrænna víkinga..

2007-09-18T14:09:00.000+02:00

..öðru nafni IKEA !! Heimsótti það í dag. Ikea menn eru nú líklega rétt í þessum skrifuðu orðum að panta rauða dregilinn fyrir næstu komu mína og hafa dreift jólabónusnum snemma í ár :O)

Annars var ferð mín þangað ekki þrautalaus. Ég er búin að komast að því að orð mín hafa yfir sér nokkra spádómsstemmingu, því að ég var rétt nýlögð af stað þegar Lúxemborgari nokkur klessti aftan á mig!! ójá.. ekki var það sauðurinn frá Íslandi sem var í órétti, heldur "hinir".. Beið bara í rólegheitum eftir að komast inná hringtorgið á leið til sænska sælulandsins þegar svakalegur karl nokkur þrusaði aftan á mig og sendi mig nokkra metra áfram. Bílarnir óskemmdir og ég líka. Maðurinn var þó í taugaáfalli (gott á hann..;O) )! Er pínulítið að stirðna upp núna og verð því frekar morkin næstu daga. Mun þó reyna eftir fremsta megni að láta það ekki hafa áhrif á mig, ekki frekar en í IKEA.

Gabríela heldur áfram að blómstra hér í Lux og les enskar smábókmenntir á kvöldið áður en gengið er til náða. Blái hnötturinn tekur síðan við á kjarnyrtri íslensku og bænirnar enda síðan kvöldið áður en augun lokast.

Erum nú í óða önn að reyna að finna leikskóla fyrir rauðhærða skriðdrekann sem bíður heima. Eftir forkönnun standa tveir eftir, Kids care og síðan ... Hansel und Gretel. Ójá, það er boðið upp á leikskóla Hans og Grétu!! Bíð spennt eftir að skoða hann og sjá hvort að nornin sé leikskólastýran og brauðmolar í matinn! Mun sérstaklega skoða eldhúsið og athuga hvort að ofnarnir séu nokkuð í óðlilegri stærð... Fylgist spennt með næstu daga!!

Þá er færslu dagins lokið, ég þakka þeim sem hlýddu...

Bestu kveðjur,
slauga schumaker

50 / 50

2007-09-17T12:12:00.000+02:00

Það var og. Frúin er mætt til fyrirheitna landsins og hóf dvöl sína á því að læra að keyra um götur Lúxemborgar. Með réttu hefði átt að gefa út viðvörun í útvarpi til hinna ökumannanna sem gátu, ekki á nokkurn hátt, talið sig örugga í umferðinni þann dag. Fyrsti klukkutíminn var í fylgd með Kristjáni, sem síðan var kvaddur niðrá lestarstöð þar sem hann þurfti að ferðast með langferðarbíl til að komast til Frankfurt Hahn. Þaðan flaug hann síðan til Íslands til að hefja seinni hálfleik flutningsins.

Við starfi Kristjáns sem leiðsögumanns tók þýð rödd enskumælandi konu sem sagði mér blíðlega hvert ég ætti að fara..."in two hundred meters, turn right.." Beið eftir því að hún myndi missa sig og orga á mig .."I said right, are you stupid or what, right, right !! Don't you get it...?" En sem betur fer var kurteisi forrituð í prógrammið og við Gabríela reyndum eftir bestu getu að laun henni kurteisina með hlýðni!

Komumst þó til Skúla og Helene að lokum og búum þar í góðu yfirlæti þeirra hjóna! Hér er mikið fjör á heimilinu enda 4 aðilar 6 ára og yngri ;O)

Er síðan búin að tékka á nauðsynjahlutum fyrir "einstæða" móður í Luxemborg, og hef einbeitt mér að því allra allra allra nauðsynlegasta. Til þeirra hluta teljast til dæmis kjörbúð þeirra félaga Henna og Mára ..ehem..... Reyni samt að stilla þessu í hóf, kaupi til dæmis ekki meira en 2 hluti í hverjum vöruflokki.. ;O)

En nóg um það að sinni, ætla að halda áfram letilífinu, sem formlega lýkur á fimmtudag þegar ég hef vinnu hér í borg.

Vona að kuldaboli sé ekki búinn að bíta af ykkur rassinn...

Bestu kveðjur úr Lúxuslandi (þar sem hitinn fór í 25+ í gær..)

slauga og gaby

Ekki búið í bili..

2007-04-08T18:46:00.000+02:00

..bara í smá bili..

Hvað er eitt "sumar" á milli vina?

2006-08-29T00:08:00.000+02:00

Sumarið búið, eins og það hafi nokkurn tíman komið. Það passar því að það líði eitt sumar á milli bloggskrifa, næstum eins og ekkert hafi liðið á milli..

Skítakuldi í vesturbænum og norðanáttin blæs.. og blæs.. og blæs vonandi ekki húsinu okkar um koll! Af Nýlendugötunni er allt gott að frétta, erum enn að leita að au-pair, ótrúlegt en satt. Við erum greinilega með svokallað negatíft aðdráttarafl þar sem okkur virðist takast að hrekja væntanleg au-pair í skóla, til annarra fjölskyldna og jafnvel annarra heimsálfa.. Þær bara vilja ekki koma til okkar! Samt reynum við hvað við getum til að lokka þær að og laða! (ég ætti þó kannski að taka nektarmyndirnar af Kristjáni af au-pair síðunni.. hmm...)

Höfum þessvegna ákveðið að ættleiða tvo litla drengi sem hvort eð er búa hjá okkur og eru þrælar okkar eins og stendur. Já.. Sigurþór og Roald héldu að sælan ein myndi bíða þeirra eftir brúðkaupið sitt, en annað kom á daginn. Þrælahald í kjallaranum og rétt svo slaki á keðjunni til að þeir nái í uppvaskið og eldavélina! Grettisgatan er sumsé "still under construction".. Tók eftir því áðan að Sissó reyndi allt til að ná símanúmerinu hjá verktakanum sem sér um aðgerðir í "Extreme makeover: Home Edition" en þeir settu alltaf einhvern texta yfir! Get samt ekki kvartað, bara gleði að hafa þá félaga hjá okkur, eldað og allt!

Veit svo sem ekki hvað er meira markvert í fréttum, fyrir utan það að þvottavélin gaf upp öndina áðan (sem er algjörlega Kristjáni að kenna, hann bara neitar að viðurkenna það, en hann stöffar hana svo að hún gat bara ekki meir) sem er ekki gott fyrir 6 manna fjölskyldu. Fer í það á morgun að fá annaðhvort læknismeðferð eða dánarvottorð!

ójú! Kristján er byrjaður á garðinum! Ætlar að smella sér í pallavinnu! Það verður frábært, enda lýstu nágrannarnir því yfir um daginn að líklega gætum við unnið verðlaun fyrir ljótasta garðinn í götunni. Held að þau þjáist að búa við hliðina á okkur!

Stelpurnar hressar, ...og nei, Rebekka er hvorki komin með tennur, hár né farin að ganga (og veldur þetta miklum áhyggjum hjá þeirri eldri, sem ber hana saman við systur Sylvíu, Henríettu, sem er 4 dögum eldri en Rebekka..).. og er það bara fínt. Þá þarf ég alla vega ekki að hafa áhyggjur af henni í stiganum strax!

Er annars að byrja í skólanum í næstu viku þannig að gleðiveturinn mikli er handan við hornið... er að bíða eftir einkunnum úr haustprófunum (prófin sem ég sleppti að taka í desember), en það er auðvitað skiljanlegt að það taki menn 3 vikur að fara yfir próf hjá 6 nemendum. REALLY!!

Jæja, nóg í bili, höndla ekki of bráða byrjun! Allt er gott í hófi fólk!

Þar til næst,

slauga

Að velja óperu..

2006-05-31T23:29:00.000+02:00

Jæja.

Konan er uppgefin. Er byrjuð að vinna aftur og hef aftur hlotið titilinn skemmtilegasta eiginkona í heimi. Er komin með sleftauminn svona uppúr klukkan átta.. kannski hálfníu á góðum kvöldum.. og þyki mjög aðlaðandi þannig.

Held að kerfið sé ekki búið að átta sig á þessari breytingu, allavega eru augnlokin vön einhverju allt öðru!

Höfum því ákveðið að fá okkur au-pair til að aðstoða með ýmislegt.. svona eins langt og það nær.. þið skiljið..´;O)

Frekar erfitt að velja, en virðumst vera að detta inná amerísku línuna. Howdie..

Ef þið kannski vitið um einhverja sem langar að koma til Íslands ;O) þá megið þið hafa okkur í huga :O)

http://www.greataupair.com

Endilega kíkið þegar þið hafið EKKERT að gera og finnið einhverja huggulega handa okkur..

3.maí 2006 - 5 ára!!!

2006-05-03T00:33:00.000+02:00

Hún á afmæl'í dag
hún á afmæl'í dag
hún á afmæli hún Gabríela
hún á afmæl'í dag

It’s all so quiet.. shhh..shhh..

2006-04-28T15:03:00.000+02:00

Þjóðarbókhlaðan.

Samansafn af “uss”-um og illum augnagotum og endurhvarf til 6 ára bekksins.

Mér finnst ég vera minnst í heiminum þegar konan með hornspangargleraugun gjóar augunum á mig yfir efri brún gleraugnanna. Ég skrifaði of hátt.

Færa stólinn vaaarleeega.. usss.. ekki missa bókina.. ekki fletta of hátt... rífðu blöðin varlega í sundur úr skrifblokkinni... usss...

Hvað myndi gerast ég tæki bara trylling hérna og brysti í söng eins og í lélegri Bollywood mynd?

Þori ekki að reyna, en ég myndi klappa fyrir þeim sem væru til í tuskið.

much ado about..

2006-04-26T11:20:00.000+02:00

Einmitt. Er á haus í próflestri og veit varla hvað ég heiti. Er búin að þræla mig í gegnum ca. 34 kafla og á eftir 7! Finn alveg að mig langar að gera eitthvað allt annað og er tiltekt í skápum jafnvel farin að hljóma spennandi. Það hefur reyndar alltaf verið akkelisarhæll minn í prófum. Að þurfa að gera eitthvað annað en að læra.
Aldrei var herbergið mitt hreinna en í stúdentsprófunum, aldrei var bíllinn jafn fínn og þegar próf stóðu yfir í Háskólanum og aldrei var eldhúsið á Framnesveginum jafn vel málað og einmitt þegar B.S. ritgerðasmíð stóð sem hæst.

Fór inn í þessa törn vitandi af þessum galla mínum og hef algjörlega reynt að halda mig frá slíkum "freistingum" þó svo að sjaldan hafi verið jafn mikil þörf á að ég sleppti mér.

Bíllinn minn er kominn á þunglyndislyf eftir að ég eignaðist hann og húsið er að bugast. Eini staðurinn sem er perfect er bílskúrinn. Mér að þakka? Nei. Pabba.

Ætla að halda þetta út og pína mig í gegnum þetta próftímabil.

Dóttirin á annars afmæli eftir nákvæmlega 7 daga. Hún telur niður samviskusamlega og tilkynnir okkur á hverjum morgni hvað margir dagar séu til 5 ára afmælisins. Hún veit að við erum búin að kaupa gjöfina og yfirheyrir pabba sinn daglega um hvað það getur verið. "eruð þið búin að pakka henni inn.." "Er ég heit eða köld.." " Er það Barbie, er það Bratz..." ...veit ekki hvaðan hún hefur þessa sjúklegu forvitni ;O)

Jæja.. 10mín. pásan búin.. back to the books...

meira síðar..

Sumar eftir tvo..

2006-04-18T17:41:00.000+02:00

Norðanvindurinn er hér með beðinn um að hundskast út í hafsauga og hleypa sunnanvindinum að. Þú hefur tvo daga til að koma þér í burtu góðurinn og getur svo mætt aftur í desember. EKKI FYRR!

hmmm...

2006-04-11T02:10:00.000+02:00

You Are an Excellent Cook

You're a top cook, but you weren't born that way. It's taken a lot of practice, a lot of experimenting, and a lot of learning.
It's likely that you have what it takes to be a top chef, should you have the desire...

Are You A Good Cook?

Hvað er klukkan?

2006-04-07T13:02:00.000+02:00

..ójá.. eitt núll fyrir kvenþjóðina!

Hef síðan í júlí s.l. dílað og vílað við hina ýmsu iðnaðarmenn, eiginlega alla flóruna.. og oftar en ekki er verið að ákveða stund og stað.

"Kem við í fyrramálið".. "Kem kl. 13.00".."Kem á þriðjudaginn kl. 9.00"...

Árangurinn? Glataður. Enginn af þeim kunni á klukku, sumir virtust ekki einu sinni eiga dagatal. Þeir kunnu alveg djobbið, ekkert að lasta það, en tímasetningar.. bara grín.

Tími sem fór í að bíða eftir iðnaðarmönnum afþví að "..hann ætlaði að koma kl. 14.00" er ómældur. Hann var of mikil.

En í gær datt ég inn í Vogue til að panta gardínur og upplifði í fyrsta skipti góða þjónustu á þeim bæ. Ekki bara góða heldur frábæra. Í lokin var það ákveðið að þau kæmu heim og tækju mál og hún flippaði yfir "skeddjúlið" og sagði, .."já, hef smá tíma á morgun, kl. hálfellefu, verð vestur í bæ..". Ég hugsaði náttúrulega ..yeah right, glætan, hef heyrt þennan áður ljúfan.. En setti upp ljúfasta kellingabrosið og þakkaði henni mikið vel fyrir að ætla að koma svona fljótt.

Klukkan er núna 6 mínútur yfir 11. Hún er búin að koma. Hún bankaði eina mínútu í hálfellefu.

Hún kann á klukku. Ég hugsa að hún kunni líka á dagatal. Hún varaði mig við að venjulega væru þetta 3 vikur, en ég yrði að taka tillit til páskana. Auðvitað.

Sjáum til, let the countdown begin. Hef fulla trú á Vogue... og kvenfólki með klukku.

Frá París..

2006-04-06T12:30:00.000+02:00

Stundum veit ég ekki í hvora löppina ég á að stíga..

2006-04-06T12:22:00.000+02:00

..það er bara allt of mikið að gera, segi ég sjálfri mér og dæsi reglulega yfir því hvað ég á bágt. Svo fréttir maður af ósköpum í kringum sig og veltir því fyrir sér hvað maður sé í raun að gera við tímann. Ég er ekki að skrifa bók sem breytir lífi þúsunda aðila, ég er ekki að finna upp lækningu við krabbameini og ég er ekki að auðga andann með neinu.. Er hætt að teikna, hef aldrei getað sungið og les varla bók í dag.. nema þá um skuldabréfaafleiður og annað álíka spennandi.

Vinir mínir eiga flestir í sama basli.. aldrei er tími til að setjast niður og anda. Bara anda og ekkert annað. Njóta samvista við vini sína og hlægja. Held að ég geri of lítið af því. Vegna þessara ótrúlegu anna, sem einhvernvegin eru svo ómerkilegir hlutir þegar litið er síðar til baka, gleymir maður að rækta samböndin og býst alltaf við því að allir séu til staðar þegar maður þarf á þeim að halda. Nýja apríl heitið mitt er því (hljómar svo miklu betra en áramótaheit) er því að rækta garðinn minn. Að öllu leiti.

Ætla að byrja hægt svo að þetta rústist ekki strax. Á það nefnilega til að henda mér í hlutina með látum og klára svo ekki af því að mér fallast hendur.

Veit ég er eitthvað voðalega væmin í dag.. en þetta er bara málið.

Sættu þig við það.

Magnað félagslíf..

2006-04-01T00:56:00.000+02:00

..eða hvað haldið þið:

"Skattframtali skilað 31.mars (föstudagskvöld) 2006 kl. 21:47"

Náði allavega fyrir mánaðarmót, var með frest til 27. en konan í skattinum sagð'ókei.. bara fyrir mánaðarmót ljúfan...

Nú hlær hún örugglega á morgun kellingin.. og segir "fyrsti aprílll fíbblið þitt..."

Sissó sagði mér allavega að hann hefði skilað tveimur mánuðum of seint í fyrra og samt á netinu! ..og ekki einu sinni komment frá skattstjóra!

Well.. ætla að færa þetta í hendur einhvers löggilts svindlara næsta ár.. endaði með að þurfa að borga helling sem er skandall! Hef ekki lent í því.. (reyndar á Kristján að borga en ekki ég.. he he.. sjáum hvort maður láni kallinum pening í ágúst..)

Til að halda upp á skilin er ég komin með Bailey's glas í hönd.. og horfi á "The Fan" á stöð 2.. aftur vek ég athygli á mögnuðu félagslífi...

Mér við hlið liggur eldri dóttirin sem sofnaði yfir idol... aftur þetta með félagslífið...

En úr því rætist kannski á morgun! Útibúið er að halda starfsdag og ég á að mæta. Svo ætlar liðið á skrallið um kvöldið.. og aldrei að vita nema að maður mæti líka þar! Kemur í ljós.. pössunarhliðin er ekki alveg frágengin enda hafa þessi blessuðu börn mín átt leiðinlegustu foreldra í heimi á síðustu vikum sem gera ekkert annað en að setja þau í pössun...

... er að spá í að skella mér í rúmið.. verst að Músíktilraunir voru að klárast og fagnaðarlætin enn í hámarki.

Veit ekki hver vann.. don't care... gleymdi samt að setja rafstraum á girðinguna hjá mér..

París.. c'est la vie..

2006-03-30T11:38:00.000+02:00

Jæja.. pínu ferðasaga gott fólk..

Það leit nú ekki út fyrir að við færum þar sem að Kristján lagðist í rúmið á fimmtudaginn með ælupest og tilheyrandi huggulegheitum. Velti því fyrir mér þann daginn hvernig óhljóð geta myndast í líkamanum og var að spá í að skrá Kristján í einhvern búktalarahóp fyrir langt komna eftir þessa upplifun.

En svo kom föstudagurinn með tilheyrandi gleði. Tók mína huggulegu sobril og við lögðum af stað. Knúsuðum Heidda, sem var að koma frá Chicago, í komuhliðinu uppi og tókum nettan snúning í fríhöfninni. Tók eftir því að Eymundsson selur blöð og bækur á fullu verði eftir að þeir tóku við rekstri blaðasölunnar og eru sko ekkert að slá af vaskinn.. í duty free zone.. ónei.... sama verð og í 101

Flugið gekk fínt út, enda ákvað ég að blanda Baileys við sobrilinn (er farin að hljóma eins og sögupersóna í "Valley of the dolls") eins og Jóa mágkona benti mér á að gera .. virkar fínt! Var alveg kúl á því og leysti sudoku í fluginu af miklu kappi.

Lentum í París og fórum á hótelið sem var æði. 4 stjörnu hótel í miðju Óperuhverfinu.. alveg ljúft..
Sjoppuðum, löbbuðum og skoðuðum... og BORÐUÐUM!

Fórum á æðislegan stað á föstudagskvöldinu. Flora. Sú sem rekur hann tók þátt í Food and Fun síðast og er staðurinn með 2 Michelin stjörnur og ekki að ósekju. Pöntuðum "surprise" dinner og enduðum í sjö rétta (höfnuðum því að fá osta í næstsíðasta rétt, gátum ekki meir, annars hefðu það verið átta) snilldareldamennsku!! Mæli með þessum stað!

Næsta kvöld var Latínukvöldið tekið og indverskur staður prófaður.. mjög góður matur en Monsieur og Madam Sjabbí Subbó reka þennan stað. Þyrftu að prófa Ajax.

Síðasta kvöldið fórum við á æðislegan sushi stað, www.losushi.com nálægt Charles de Gaulle stöðinni.. Sátum á móti frönsku celeb liði sem við vissum ekkert hver voru.. en við vissum bara að þau voru subbu fræg, höfðum bæði séð þau áður, ..en hvar..?

Tókum hallærispakkann og smelltum mynd af þeim með símanum (leikþáttturinn "þykist vera að senda sms og tek mynd" var tekinn með trompi og enginn fattaði neitt). Spurningin er því:
Hver þekkir fólkið? Bene.. ég treysti á þig..!!

Tókum nettan túristapakka á sunnudeginum.. Allt nema Eiffelturninn og Louvre, fórum upp í Montmartre og skoðum mannlífið.. Svo var það dáldið merkilegt með margastaði, en þá virtist ég alltaf eiga einhverja hrakfallasögu af Hólmfríði? ..ljósakrónur og lögreglubílar? Anyone? ;O)

Fórum síðan heim á mánudag.. og fengum ekki sæti saman. Kristján reyndi að útskýra fyrir flugfreyjunni að ég væri frekar mikið flughrædd og hún horfði á okkur blíðum augum og sagði "Þið getið bara haldist í hendur yfir ganginn"... einmitt.. ótrúlega rómó móment sem við ætluðum að ná ná í viðbót með því að sitja saman í flugvél og nota flughræðslu sem afsökun.

Þegar tárin byrjuðu að renna án þess að ég réði við það þá fattaði hún að ekki var allt sem sýndist og Parísarþráin var ekki svona sterk hjá okkur. Gat ekkert gert við þessu, algjörlega óviðráðanleg viðbrögð! SKILETTEKKI!! Hélt síðan að flugvélin myndi hrapa nokkrum sinnum.. með tilheyrandi örvæntingu.. og var síðan ótrúlega glöð og hamingjusöm þegar vélin skransaði á Keflavíkurflugvelli.

Rámaði samt í fréttir af varnarliðinu og eitthvað um að þeir gætu líklega plöggað eitthvað úr sambandi undir skrifborði einhvers aðmírálsins og þá tækju þeir allt úr sambandi á vellinum.. Svona hugsanir ríkja í kollinum á flughræddu fólki.

Líka hugsanir eins og "líkurnar á því að farast með flugvélinni eru í öfugu hlutfalli miðað við fjölda frægs fólks í vélinni"... eða .."ótrúlega er þetta mikið jarðafararlag sem er verið að spila í útvarpinu hjá bílstjóranum sem keyrir okkur út á völl.. tilviljun.. held ekki".

Kleppur - Hraðferð, here I come.

Kristján...

2006-03-29T13:15:00.000+02:00

...er búinn að skrá mig á flughræðslunámskeið. Án þess að spyrja mig.

Þarf ég að segja fleiri orð um það hvernig ferðin gekk?

11 ár..

2006-03-22T14:41:00.000+01:00

síðan ég kom heim frá París eftir 9 mánaða dvöl sem au-pair. Sex ár síðan við stelpurnar fórum út á 5 ára reunion. Hmm.. veit þetta náttúrlega upp á hár þar sem ég varð 23 ára í gær (líka hægt að lesa tölurnar afturábak og þá með leiðinlegri niðurstöðu..).

Það eru sumsé 2 dagar í það að ég fari aftur út, nú með kallinn með mér. Það liggur mikið undir þar sem hann heldur örugglega að ég hafi stúderað París og þekki hana eins og lófann á mér. Glætan! Við uppgötvuðum t.d. bara 3ja hverfið (sem er eiginlega það skemmtilegasta) þegar við fórum fyrir 6 árum! Einhvern veginn var þetta dvöl sem einkendist meira af "paris at night" og í lestum... Tók ekki alveg túristapakkann nema þegar einhver kom í heimsókn! (og þá varla..). Þarf líka að rifja upp frönskuna (hann heldur að ég sé fluent.. djók! )

Það eru sumsé 2 dagar í flugið... got it? Vona ótrúlega að Inga mamma hennar Auðar verði að vinna eða Gullý systir Lallý...Þarf eitthvað svona róandi andlit í crew-inu sem getur hjálpað mér! Vona að þetta gangi vel.. en þeir sem hafa setið mér í flugvél vona það örugglega líka, svona fyrir hönd hinna farþegana.

En sobril töflurnar fá sko samt að koma með, þeim finnst gaman að fljúga. Einu sinni ákváðu þær (á leiðinni frá Boston) að það væri skemmtilegast að vera þrjár saman. Í staðinn fyrir single..

Man ekki eftir flugferðinni. Man eftir að Erla skildi mig eftir í fríhöfninni og ég sagðist vera að koma. Man eftir fríhöfninni í slow mo.. man ekki meir. Skammaði svo Kristján fyrir að hafa ekki verið heima til að taka á móti mér. Sannleikurinn? Hann var heima.. leiddi mig inn, lagði mig í rúmið og kom svo heim í hádeginu aftur til að tékka á mér. Held það verði ekkert sobril tríó í þessari ferð. Kannski duo, enda virkar þetta ekki solo... mio...

Eða kannski verð ég bara full.. nenni því samt ekki.

Munið bara þegar þið lesið moggann og sjáið "Flugdólgar eru ekki bara karlkyns.." þá er væntanlega verið að tala um mig.. og þá voru sobril töflurnar búnar.

Hver þarf snuð þegar tær duga?

2006-03-20T20:57:00.000+01:00

Músíktilraunir..

2006-03-19T23:13:00.000+01:00

..hefjast á morgun. Hef svo sem aldrei skipt mér af þeim.. veit varla hver vinnur eða vann það og það árið. Í ár verður þó breyting á.

Mér til ómældrar gleði og yndisauka hafa aðstandendur músíktilrauna ákveðið að halda keppnina í...

já.. þið giskuðuð rétt....

LOFTKASTALANUM.. jibbý!!!!

Á hverju einasta kvöldi í næstu viku mun gleðin dynja hér fyrir utan. Aðdáendur bílskúrsbandanna munu að sjálfsögðu mæta til að hvetja sitt lið og kannski míga á grindverkið mitt í leiðinni? Hver veit?

Get ekki lýst gleðinni í hjarta mínu yfir þessari ákvörðun.

...lengi lifi rokkið....

..það les þetta hvort eð er enginn..

2006-03-15T11:28:00.000+01:00

..eða svo segir Leibbi frændi. "Það kommentar enginn hjá þér og það eru örugg merki um engan lestur!"..

Neita að trúa því, tel mér bara trú um að mínir lesendur séu bara svona hógværir..

Finnst þetta samt ágætis miðlun. Mín sterkasta hlið er nefnilega ekki sú að vera "tengillinn" í vinahópum. Ég fæ bara svona að vera með.. Hólmfríður er hetjan mín, alltaf að plana eitthvað og ótrúlega dugleg við halda halda hin ýmsustu boð, sem ég mæti þó ekki alltaf í, en reyni að komast þegar ég get! Hún er svon "lím". Ekki það að ég ætli að breytast í einhverja innirottu sem að tjái mig aðeins í gegnum miðla sem útiloki alvöru tengsl.. nei nei.. ekki aldeilis...

Flughræðsla - Part II.
Var að horfa á nfs og þar var Sigurður stormur að tala um hvað væri ægilega öruggt að fljúga þrátt fyrir vond veður... ...bara smá láréttir og lóðréttir og skáréttir vindar sem blása og hvása.. eruð þið farin að fatta plottið? Veit ekki hvort að þetta er samsæri gegn mér, en ég sé bara fréttir af flugvélum núna og virðist heyra og sjá allt sem álpast í fjölmiðla um þennan flokk. Tilviljun..? Held ekki.

Kannski meira á eftir.. skiptir náttúrulega ekki máli þar sem enginn les þetta ;O)

Það er árið 2006...

2006-03-13T14:54:00.000+01:00

...en eitthvað hafa þeir ruglast á dagatölum hjá Íslensk-Ameríska..

Krisján fór í Bónus allra landsmanna í gær og verslaði inn... svo sem ekkert tilitökumál, en í þessari ferð voru einnig keyptar bleyjur á prinsessuna. Með þeim fylgdi síðan bæklingur sem bar heitið:

"Töfrar svefnsins"
Fyrir mæður með börn á aldrinum 0-6 mánaða.

Mæður?? hvað með feður? hvaða rugl er þetta á þessari öld? ..og ef þeir ætla að fara að skýla sér bakvið eitthvað bla bla um að konan sé heima í 6 mánuði og karlinn svo skal þeim bent á að í lögunum um fæðingarorlof (95/2000) stendur:

8. gr. Réttur foreldra á vinnumarkaði. Foreldrar, sbr. 1. mgr. 1. gr., eiga sjálfstæðan rétt til fæðingarorlofs í allt að þrjá mánuði hvort um sig vegna fæðingar, frumættleiðingar eða töku barns í varanlegt fóstur. Þessi réttur er ekki framseljanlegur. Auk þessa eiga foreldrar sameiginlegan rétt á þremur mánuðum til viðbótar sem annað foreldrið getur tekið í heild eða foreldrar skipt með sér. …1)

akkúrat!

Í einu orði: Hallærislegt! held þeir ættu að endurprenta þennan bækling..

úff.. eins gott að Rebekka á ekki eftir nema mánuði í 6 mánuðina.. þá getur hún farið að kynnast pabba sínum...

hrumpfh...

ætli þeir séu ekki bara með dagatalið hans Norman Rockwell uppi við frá 1956 sem sýnir hina "fullkomnu fjölskyldu" ..

Í flokknum um fallegasta eldhúsið..

2006-03-10T12:51:00.000+01:00

..hlýtur Nýlendugatan verðlaunin...

Í alvöru.. er til flottara eldhús?

Ég sé...

2006-03-10T11:25:00.000+01:00

..Esjuna og ýmislegt annað eftir að blái viðbjóðurinn kvaddi þetta líf í gærkvöldi. Við urðum alltíeinu vör við blikkandi ljós þar sem að lögreglan var búin að loka Mýrargötunni.. væntanlega vegna þess að ef allt hefði farið á versta veg hefði framhliðin fallið framfyrirsig.. sem hún gerði nú reyndar ekki... en hún féll þó!

Ákvað að skella inn nokkrum myndum, til að sýna muninn.. en nú þarf maður að venjast nýju útsýni! Þeir eiga nú eftir að hreinsa betur upp en þetta er allt að koma hjá þeim. Þetta hús hefur haft ótrúlega vonda nærveru þann tíma sem við höfum búið hér vestur frá. Tvisvar hefur hefur verið kveikt í því .. og þrátt fyrir að okkur finnist plús að hafa smá "happening" í kvöldverðarboðum hjá okkur, þá var þetta ekki alveg málið! Útigangsmenn hafa búið þarna og krakkarnir í hverfinu hafa sum hver teflt á tæpasta vað með því að "rannsaka" húsið í því ömurlega ástandi sem það hefur verið.

Nú er sumsé Martröðinni á Blá-stræti að ljúka. Vertu bless ljóta hús.. vertu bless. Þín verður ekki saknað.
Svo er líka svo gaman að sjá hvað var bakvið hryllinginn... hmm.. þarna sjáum við Esjuna, sjáum inn á Fiskislóðina og svo annan gaflinn á einhverju húsi sem ég þarf að komast að því hvað er..

Hlakka til að sjá hvað verður sett í staðinn, ég veit ég missi útsýnið aftur, en gæti mögulega fengið eitthvað huggulegt í staðinn. Ég set bara fram eina kröfu.. og ég meina það! Þegar verður farið að byggja upp nýja húsið sem kemur þá krefst ég þess að þeir sem ráði þar ríkjum velji iðnaðarmenn eftir útliti. Ég vil huggulega iðnaðarmenn sem að myndu sóma sér vel á hvaða centerfolderi sem er .. Engar rassaskorur takk! Ég verð með besta útsýni bæjarins yfir framkvæmdirnar og ég vil eitthvað til að horfa á...

Þegar maður hefur neyddur til að éta hafragraut í öll mál er lágmark að maður fái nokkra konfekt mola á eftir.. erþaggi? Centerfoldera og huggulega sveina!

Lágmarkskrafa.

Mamma...

2006-03-09T12:29:00.000+01:00

..hún er elskuleg mamma mín..

..til hamingju með daginn !!

hipp hipp húrra!!

Þvottadagur...

2006-03-08T11:22:00.000+01:00

...eins og allir aðrir dagar! Velti þvi fyrir mér hvernig hægt er að þvo endalaust og aldrei sér fyrir endan á því!!

Kristján er með ótrúlega góða taktík.. hann setur endalaust í þvottavélar og safnar svo bara upp í stóran haug. Kristján á nefnilega galdraduft sem hann stráir stundum yfir þvottinn og þá birtist hann samanbrotinn og tilbúinn til notkunar þegar hann kemur heim úr vinnunni... yeah right!

Held að heimavinnandi húsmóðurs djobbið hljóti að vera það erfiðasta í heimi.. það er allavega það leiðinlegasta í mínum augum af því að það virðist aldrei vera búið! Verð að finna út hvernig Mary Poppins fór að þessu..

Er að fara til tannsa á eftir! Eftir næstum tveggja ára fjarveru frá þeim manni... Er pínu stressuð, þó ég sé sko ekki með neina tannpínu... hann gæti verið blankur og fundið eitthvað sem þurfti nauðsynlega að laga!

..og svo þurfum við að ræða FLUG! Eins og flestir vita sem þekkja mig er ég sjúklega flughrædd og er ekki alveg að höndla þann pakka... var samt búin að ákveða að Frakklandsflugið yrði ótrúlega frábært.. Ég myndi bara labba upp í vél, kannski fá mér einn Bailey's eða tvo... leysa nokkra sudoko og vera með yatsí-ið tilbúið og ..kviss kvamm búmm.. allt í einu yrðum við bara lent í "ðe sití of löööv..." . En nei.. þá þurftu Flugleiðir náttúrulega að klessa á eldingu og keppast núna við að fullyrða í öllum fjölmiðlum að það sé "ógisslega safe skilurru" að fljúga, skítt með nefið á vélinni.. GLÆTAN! Svona hlutir koma aldrei einn í einu, solo... þessi atriði eru svona félagsveruatriði.. alltaf 3 í einu.. þannig að Bailey's flaskan fer fljótlega að breytast í risastóra róandi töflu eða bara sleggjuhamar sem ég bið Kristján um að dúndra í hausinn á mér rétt fyrir flugtak.

Velti þvi fyrir mér hvort að ég væri enn á Grænlandi ef Erla hefði í alvörunni fengið flugstjórann til að lenda þegar ég "missti það" í vélinni til Boston... Væri kannski orðin selaveiðimaður sem gæti ekki drepið seli og myndi endurskýra þá alla Snorra..?

Þriðjudagar..

2006-03-07T15:03:00.000+01:00

..eru venjulega miklir skóladagar..

En einhvern veginn er dagurinn í dag hálfruglaður... Hefði átt að fara í lögfræði kl. 8.15....en fór ekki.. Hefði átt að fara í bankaogfjármálmarkaði kl. 13.15...en fór ekki, er reyndar að spá í að hætta í þeim kúrs altogether. Á svo að mæta í skuldabréfakúrsinn hans Hersis kl. 16.15 og hef hugsað mér að mæta þar... þarf reyndar að skjótast í vinnuna smá áður og láta Öddu fá tilbaka gögn sem ég var að kíkja á fyrir hana...

Alltaf gaman að kíkja í vinnuna, heyra símann hringja og alla fara á taugum í stressinu...og labba svo bara út .... ;O) Það er annars farið að styttast allverulega í hinn endann á fæðingarorlofinu.. Bara rétt 2 mánuðir eftir (með lengingunni) og þá er bara life back to normal!

Erum búin að bjóða mömmu au-pair stöðuna hjá okkur... enda er hún að smella sér yfir í löglega pakkann eftir 2 daga (jebb...sixtyseven...)..en nei.. hún neitar okkur statt og stöðugt..

Skiljumettekki..

Bíðum bara eftir að Sveinbjörn reki Kollu og þá vantar kellinguna djobb...

..og Óskarinn hlýtur...

2006-03-06T11:13:00.000+01:00

Þyrnirós!!!

Ójá! Litla prinsessan á bauninni fór í prep leiðangur í 10-11 kl. 23.30 í gærkvöldi til að undirbúa vökunóttina miklu. Hún hafði fengið að sofa út um morguninn og taldi að sér væru allir vegir færir að vaka og vaka... og fá að upplifa með stjörnunum "sínum" þeirra gleði og sorgir og fella með þeim hamingjutár ef svo bæri undir... (glætan samt að hún sé svona væmin, frekar mikið hörkutól sko...). Man eftir að hafa séð Rachel Weiss koma með bumbuna sína og taka á móti verðlaunum ...og svo...man ég eftir að hafa opnað augun óvart og séð ófrýtt trýnið á Mr. Hoffman... (ég hélt nefnilega með Phoenix)...og svo vaknaði ég bara við "taumlausa tónlist" um 5 leytið....

Sá ekki einu sinni aðalnúmerið! Fyrirgef augnlokunum seint þessi svik! Veit ekki afhverju þetta er að koma fyrir mig.. man þá daga þegar maður fór létt með þetta .. trúi ekki að þetta séu árin?

Horfði samt á upphitunina á stöð 2 og var þvílíkt að verða geðveik á að horfa á þau Mörtu, Skarphéðinn og Ívar... Ég hef hingað til haft mjög gaman af því að lesa pistlana hennar Mörtu, ...en að heyra orðið "þannig" að meðaltali 6 sinnum í hverri setningu var aðeins of mikið fyrir minn smekk... þá hefði verið betra að hafa tískulöggurnar Arnar eða Svavar...

Afmælið mitt nálgast óðfluga, og tók skatturinn að sér að strá glitkornum og glimmeri á afmælið mitt með því að auglýsa síðasta skiladag á þessum heilaga degi! Hver vill tengja afmælið sitt við skattheimtuna? Ég bara spyr?

..styttist líka í að við förum til Parísar... sem minnir mig á annað.. Ég sendi tölvupóst á hótelið og bað þau um að sjá um að panta borða á ákv. veitingastað.. og fæ ekkert svar.. Er þetta ekki alveg normal þjónustubeiðni?..

Jæja.. ætla að skella í mig einum kaffi í viðbót (er búin að endurheimt kaffivélina mína sem var í sjálfskipaðri útlegð þar til að eldhúsið væri tilbúið)... verð fín í Itô dæmin á eftir sem hann Hersir skuldabréfagúrú setti fyrir tímann á morgun...

tata...

Hann kom..

2006-03-04T13:21:00.000+01:00

..en climaxið vantaði..

Merkilegt nokk.. rafvirkinn droppaði við í gærkvöldið, boraði og boraði, yfir Idol-fjölskyldukvöldinu.. og tengdi í gríð og erg. En auðvitað var ekki allt klárað. Þegar setja átti lokið yfir dósirnar kom í ljós að hann var ekki með þær.. ég meina afhverju að klára það sem hægt er að klára ef hægt er að skilja eitthvað eftir? "Tveggja mínútna verk"..fullyrti hann, en mín spurning er náttúrulega; Hversu langt er þá í þessar tvær mínútur?

Vill einhver giska?

Var að spá...

2006-03-03T11:12:00.000+01:00

..hvort það væri alveg eðlilegt að líta svona skelfilega út þegar maður er veikur. Ég meina, ég viðurkenni alveg að ég eigi langt í land með að verða krýnd Miss World, jafnvel á mínum bestu stundum.. en þegar smiðurinn, sem kom í morgun, hrökk hálft skref tilbaka þegar ég kom til dyra.. þá hlýtur eitthvað að vera "off". Fattaði síðan að ég hef líklega ekkert verið skárri í gærkvöldi þar sem eiginmaðurinn kom með mynd sem skartar hinni mistæku leikkonu Drew Barrymore í aðalhlutverki. Fyrir þá sem ekki vita það, skal það upplýst að Kristján dýrkar og dáir og þráir þessa fyrrum E.T. stjörnu. Ef að hann væri spurður að því hvort hann væri tilbúin til að stíga hliðarspor út úr hjónabandinu, og með hverjum þá, yrði svarið ofannefnd D.B.

..og með ljótustu eiginkonu sér við hlið í gærkvöldi..leigir hann mynd með goðinu! Sem hljóta að vera einhver merki um að hann hafi fengið nóg af ljótleikanum og vilji horfa á "krúttið sitt"... veit ekki hvernig ég á að taka þessu...?

Eldhúsið mitt er annars að verða æði.. fyrir utan raflagnir... í einu orði sagt: "hryllilegaflott". Hvet nærstadda sem fjarstadda til að kíkja í kaffi... lofa að hósta ekki ofan í það... Stend þó við það að ég set ekki mynd af því fyrr en allt er reddý... sem þýðir að rafvirkinn ræður ferðinni.

Ætla að prófa að tækla hann á eftir, er að spá í hvort ég verði að hringja með falið númer..

Brilljant skilnaður... án mín.. :O(

2006-03-02T21:32:00.000+01:00

Er komin með flensuna. Hef ekki fengið flensu í mörg ár og finnst ég vera svikinn af flensudílnum sem ég hef verið lengi þáttakandi að. Ligg í sófanum, það rennur úr augunum á mér, ég hósta og snýti mér og skipa restinni af heimilismeðlum fyrir. Reyndar er helmingurinn sofnaður, og eiginmaðurinn í sendiferð í Húsasmiðjuna, Apótekið og Vídeóleiguna, en eins og allir vita er mikilvægasta í veikindum að hafa eitthvað óhollt við hendina og glápa á heilalaust efni...

Gunni bróðir, snillingurinn, kom áðan og tengdi fyrir okkur vaskinn. Get því hætt að vaska upp úr klósettvaskinum..

Það versta við þetta er náttúrulega að ég komst ekki í leikhúsið...

Aumingi í hnotskurn

2006-03-02T14:49:00.000+01:00

Held ég sé að verða lasin. Ég sem fæ eiginlega aldrei flensu eða neitt! Geng hérna um hölt og snýti mér í gríð og erg. Heltin er tilkomin vegna afnáms fæðingarbletts á milli tánna!!!!!! framkvæmt af 78 ára gömlum lækni (skrifaði langt blogg um þetta um daginn en tók það í burtu... ..bara til að koma í veg fyrir mögulega lögsókn...).

Á að fara í leikhús í kvöld með tengdó og öllum kvenkyns meðlimum þeirrar ættar. Vonast til að ná að hrista þetta af mér fyrir kvöldið.. langar ferlega að sjá þetta stykki: "Alveg brilljant skilnaður" (veit samt ekki hvort þetta eru skilaboð til okkar tengdadætrana ;O) ) . Bið allavega þá afsökunar, fyrirfram, sem verða með mér í leikhúsinu í kvöld ef snýtuhljóðin skyldu trufla.. lofa líka að hósta lágt og vera í hreinum sokkum... (get ekki verið í skóm..útaf tánni sko..).

Loforð til sölu...kostar eina tölu...

2006-03-02T14:39:00.000+01:00

ókídókí... eldhúsið er að koma.. svona næstum því... Vorum hér sveitt fram eftir kvöldi að reyna að ganga frá sem flestu og koma hæðinni "aftur" í eðlilegt form. Ekki alveg búið, en svona 80%

Rafvirkinn hefur ekki látið sjá sig þrátt fyrir loforð um að koma í fyrrakvöld. Átti reyndar áhugavert samtal við hann í gær:

"ring ring " (veit reyndar ekki hvernig hringingin hans er í gemsanum).
R: "Já halló..."
S: "Sæll.. þetta er ég... mannstu?"
R: "Já, sæl ..sæl..."
S: "Heyrðu, ég varð ekkert vör við það að þú hefðir komið við í gærkvöldi.."
R: "Nei, ekki ég heldur, varð bara ekkert var við það"
S: "Hvernig er þá staðan núna? Geturðu komið í dag? Sem fyrst?"
R: "Ja, nei.. sko núna er ég nefnilega veikur ...sko..."
S: "En þú býrð nú bara stutt frá (sama gata), get snýtt þér af og til..."
R: "humm ehemm..."
....svo koma nokkrar innilhaldslausar setningar sem ég man ekki en síðan.....
S: "Heyrðu, hvernig er það, get ég búist við þér í kvöld eða síðasta lagi á morgun"
R:"Nei, ég held að það sé útilokað, er nefnilega á Þingvöllum...."
S: "....Rosa veikur?..."
R: ..þögn...

;O)

Don't kid a kidder....

Hjálpum þeim...

2006-03-01T12:19:00.000+01:00

Í dag er "Hjálpum aumingjunum" dagurinn eða "hjálpum þeim" dagurinn eins og ég vill frekar kalla hann. Það er sumsé kominn á samningur á milli elskulegra foreldra minna, sem að leyst ekkert á það hversu mikið rugl væri í gangi við það að koma húsinu í lag... og mín (og jú auðvitað Kristjáns..en hann er bara svo vel upp alinn að hann ögrar ekki geðheilsu eiginkonunnar)! Samningurinn felur sumsé í sér að þau koma á miðvikudögum og taka brjálæðiskast með mér í einhverju útvöldu herbergi.. Þau halda að þau séu að þröngva sér upp á okkur... en vita ekki að þetta er úthugsað plott.. og að á meðan þessu stendur mun ég setja Jörfalindina á sölu og neyða þau til að flytja í kjallarann... Þá þurfum við ekki að fá okkur Au-Pair skiljiði....

Annars er Kristján mjög heitur fyrir að fá au-pair á svæðið... hann skoðar nú au-pair síðuna með glampa í augum og dregur fram hverja ljóshærðu píuna á fætur annari. Núna er einhver dönsk í sigtinu hjá honum... en ég hallast meira að franskri.. svona til að endurgjalda Frökkum greiðann! Ég held samt að hann sé eitthvað að misskilja hlutverk au-pair stúlkna... ætti kannski að snúa á hann og velja strák..

Öskudagur...

2006-03-01T12:09:00.000+01:00

Framkvæmdir, "the never ending story.."

2006-02-28T13:57:00.000+01:00

Jæja.. helgin búin og eldhúsdagar standa yfir. Höfum sent áskorunarbréf til þáttakanda í keppninni "klárum eldhúsið" og væntum þess að viðkomandi iðnaðarmenn sýni sínar björtustu hliðar í þessari viku. Stein(aldar)mennirnir sviku okkur illilega með því að taka í sundur borðplötuna.. en við byggðum m.a. ákvörðunina á því að skipta við þá í stað samkeppnisaðilans..á því mikilvæga atriði að þeir töldu sig ekki þurfa að taka plötuna í sundur. Sit því uppi með viðbjóðsleg samskeyti og hærri reikning! Hrumpf! Á eftir að segja lokaorðin í þessu máli!

Plataði aumingja slúbbertinn til að hjálpa til við að setja upp viftuna í gær.. fullyrti við Þráinn frænda að þeir hefður smíðað þetta vitlaust þar sem við komum ekki kvikindinu upp í gatið.. en með því að ýta og þrýsta.. þá allt í einu small þetta... uppgötvuðum síðan þar sem við stóðum eins og bjánar sitthvoru megin við eldavélina og héldum við viftuna að við hefðum líklega þurft auka hönd á verkið. Kolla mág var því rifin úr rekkjunni með tilheyrandi urri til að hjálpa...(ég meina hver sefur um miðjan dag?) Komum síðan draslinu fyrir og skrúfuðum allt fast.. er núna agalega glöð með þetta.. set inn mynd af draslinu þegar síðasti iðnaðarmaðurinn labbar út!

Var hjá Ólu skólakonu í gær þar sem við byrjuðum á því að fara yfir það hvað við ættum bágt með það að vera í skóla.. spáðum í að hætta.. sem við auðvitað gerum ekki, en það er bara skemmtilegra að fara í gegnum alla vorkuninna.. og enduðum auðvitað á því að uppgötva hvað við værum ótrúlega æðislega duglegar og frábærar í alla staði.. ;O)

Erum að fara að hella okkur í 2 verkefni í "samrunum og yfirtökum" og lentum í því að skrifa um Landsann.. hvaða tilviljun er það nú? Undarlegt, vinnum þar báðar! Hljótum að fara létt með það.. annað mál með lokaverkefnið sem er um Avion.. en.. það reddast..erþaggi..?

Sumsé, skóli og eldhús..

Umsátur

2006-02-25T02:32:00.000+01:00

Þetta er náttúrulega orðið rugl! Nú.. milljónustu helgina í röð er umsátursástand hér fyrir utan! Lögreglan er að sjálfsögðu á staðnum, nú með 2 stóra bíla og 2 venjulega.. en gerir að sjálfsögðu ekki neitt. Öskrin í smástelpunum og raddæfingar hellisbúana hljóma hérna fyrir utan.. þannig að nauðsynlegt verður að loka öllum gluggum til að fá "svefnfrið". Verst að þá verður bara svo ofboðslega heitt í herberginu að ekki er hægt að sofa!

Ég skora á stjórnendur Loftkastalans að hætta þessu Menntaskólarugli og einbeita sér aftur að listviðburðum. Það er skömminni skárra að finna ekki stæði hérna frá 9-12...en hafa síðan kyrrláta nótt heldur að búa við þetta helv..
Smellti mynd af lýðnum.. verst að það sést bara hluti... en hér er um að ræða ca. 200 manns.. að lágmarki!
Síðan mígur þetta lið á grindverkið okkar.. og bætir sér þannig í hóp ferfætlingana sem koma hér með eigendum sínum á blettinn við hliðina á og gerir þarfir sínar. Eina huggun mín við það er að liðið sem er að míga er væntanlega búið að stíga í hundaskít á meðan það gerir þarfir sínar í fínu lakkskónum..
Geisp! Þrái svefn.....

2006-02-24T15:55:00.000+01:00

á ég að þora að byrja aftur...?

2006-02-24T15:32:00.000+01:00

Jæja.. það kom að því! Ákvað að reyna aftur við bloggpakkann.. Síðast þegar ég reyndi var ég að á barmi taugaáfalls vegna kaupákvörðunar okkar Kristjáns vegna Huldulandsins.. þannig að einhver tími er greinilega liðinn! Sit núna í "could be called a kitchen..but..." og urra af vonsku yfir iðnaðarmönnum og sviknum loforðum! Velti því fyrir mér hvort það skaði að vera skyldur viðkomandi eða ekki?
Sumsé! Tvær vinnuvikur liðnar frá því að Þráinn frændi sendi mann á staðinn að setja upp eldhúsið mitt.. og er það tilbúið? NEI! Steinamennirnir hafa einnig uppgötvað að þögnin er gulls ígildi.. sérstaklega þegar þeir eru komnir með gullið mitt en ég ekki steininn þeirra!! (áhugavert.. gull í stað steins? hljóta að vera léleg skipti!)....
Þetta þýðir aðra helgi í hálfkláruðu eldhúsi.. ...vinsamlegast aðvarið staffið á Dominos..

Er enn í ruglinu með skólann.. er að velta því fyrir mér hvort ég eigi að segja mig úr hinum æsispennandi áfanga "Bankar og fjármálamarkaðir" (kom á óvart að ég valdi kúrs með því nafni..? anyone..?).. og láta hina 3 duga þessa önnina! Var á barmi taugaáfalls vegna Skuldabréfa kúrsins sem Hersir klári er að kenna.. en við náðum að jafna það með miðsvetrarprófi í síðustu viku þar sem taugaáfallið færðist yfir á Hersi og er hann væntanlega ennþá að velta því fyrir sér hvernig hann gat endað með jafn vonlausan hóp! ..well hann ætlar allavega að endurskoða dæmið og vonandi verður kúrsinn fyrir eðlilegt fólk sem og mæður í fæðingarorlofi (en eins og allir vita þá minnkar heilastarfsemi um ca. helming meðan á því stendur...).

..hm.. jæja.. er byrjuð...
nú er ekki aftur snúið! skrifa örugglega meira í dag eða á morgun.. en eins og allir vita er ég alltaf ofvirk í öllu í byrjun en síðan dalaaaar....... ;O)